berriak

Amurrioko Udalak segurtasuna hobetu du Aldaiturriaga eta Mendixur kaleen arteko bidegurutzean, trafikoa semaforo bidez erregularizatzeko sistema baten bidez, eta oinezkoentzako pasagune berri bat sortu du Aldaiturraga kaleko 1. zenbakiaren parean. Lanek 50.356 euroko inbertsioa eskatu dute.

Bidegurutze horretako segurtasuna hobetzeak, urtero Udalak egiten dituen auzo-batzarretan Aldaiturriaga auzoko bizilagunek egindako eskaeretako bati erantzuten dio. Obren ondorioz, 5 semaforo jarri dira. Otsailean egin zen lehenengo fasea, ibilgailuen eta oinezkoen zirkulazioa arautzeko eta, horrela, inguruko segurtasuna hobetzeko. Semaforoak jartzeaz gain, beste jarduketa bat egin da, azken aste hauetan oinezkoentzako pasabide berri bat egin da, Aldaiturraga kaleko 1. zenbakiaren parean. Oinezkoen pasabide berri hori herritarrek aktibatuko dituzten sakagailuekin erregulatuta dago.

“Jarduketa horrek Aldaiturriaga eta Mendixur kaleen arteko bidegurutzean ibilgailuentzako eta oinezkoentzako segurtasuna asko hobetzea ekarriko du. Gainera, Aldaiturriga auzoko bizilagunek auzoetako asanbladetan egindako eskaeretako bat da. Gure konpromisoa herritarren segurtasuna hobetzeko lanean jarraitzea da”, azaldu du Txerra Molinuevo Amurrioko alkateak.

Amurrioko Udalak AmurriokoEKIN aurrekontu parte-hartzaileen prozesuan amurrioarrek sartu nahi dituzten proposamenak bilduko ditu bihartik, urriaren 20tik, aurrera. Prozesu irekia da, udalerriko biztanleek udal aurrekontuko 430.000 euro erabiltzeko moduari buruzko ekarpenak egin ditzaten. Proposamenak aurkezteko epea azaroaren 2an amaituko da.

Amurrioko Udalak AmurriokoEKIN prozesua jarri du martxan berriro, herritarrek 2022an 215.000 € eta 2023an beste 215.000 € zertan inbertitu erabaki dezaten. Aurten, berritasun gisa, aurrekontuaren zati bat 48.000 eurotik gorako aurrekontua duten proposamenetara bideratuko da, eta beste zati bat 48.000 €-tik beherako proposamenetara. Horrela, lehen urte honetan 48.000 €-tik beherako aurrekontua duten proiektuetara bideratuko da, eta 2023rako, proiektuei forma emateko denborarekin jadanik, proiektu handiagoak gauzatuko dira.

“Udaletik aurrekontu parte-hartzaileen AmurriokoEkin prozesua martxan jarriko dugu berriro, eta herritarrak prozesuan parte hartzera animatu nahi ditugu. Guretzat oso garrantzitsua da Amurrioko herritarren ikuspegia kontuan hartzea, herriaren etorkizuna planifikatzeko”, azaldu du Txerra Molinuevo Amurrioko alkateak.

16 urtetik gorako amurrioarrek nahi beste proposamen egin ahal izango dituzte. Aurkeztutako proposamenek baldintza hauek bete beharko dituzte: Amurrioko Udalaren eskumenekoak izatea; ikuspegi teknikotik bideragarriak izatea; urte bakoitzerako ezarritako gehieneko aurrekontuaren barruan sartzea, 215.000 euro gainditu gabe; interes orokorrekoak, eta ez pribatukoak izatea; eta, horrez gain, gobernu-taldeak ezarritako mugak errespetatu beharko dituzte, hauek ez kaltetzeari dagokionez: ekitatea, euskara, osasuna eta jasangarritasuna.

Parte hartzeko bideak

Proposamenak azaroaren 2ra arte aurkeztu ahal izango dira, era birtualean edo aurrez aurre. Horretarako, Amurrioko etxe guztietan liburuxka bat postontziratuko da, erantsitako galdetegi batekin. Liburuxka horiek udaletxean, Bañueta kiroldegian eta Kultur Etxean dauden postontzietan utzi ahal izango dira, edo Herrilaguntzaileei entregatu ahal izango zaizkie parte hartzeko aldian. Azoka egunetan karpak jarriko dira San Anton plazan, parte hartzea errazteko. Gainera, online ere parte har daiteke Amurriokoekin webgunearen bidez, edo posta elektronikoz Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidean.

Faseak

Aurrekontu parte-hartzaileen AmurriokoEkin prozesua lau fasetan gauzatuko da: proposamenen aurkezpena, proposamenen lehenespena, bideragarritasunaren azterketa, , eta bozketa.

Proposamenak jaso ondoren, Udalak prozesuan parte hartzeko ezarritako baldintzak betetzen dituztela egiaztatuko du, eta, ondoren, lehentasunei buruzko fase bat egingo da. Fase horretan, 48.000 €-tik beherako kostua duten 10 proiektu, eta 48.000 €-tik gorako kostua duten beste 10 proiektu hautatuko dira. Lehentasunak aurrez aurreko saio irekietan ezarriko dira, irizpide hauetan oinarrituta: proposamenak biztanleriako sektorerik ahulenei (langabetuak, adinekoak, emakumeak, migratzaileak, dibertsitate funtzionala duten pertsonak...) mesede egiten edo eragiten al die? Eta proposamenak ingurumena eta klima-aldaketaren aurkako borroka hobetzen edo indartzen al du? Ondoren, lehenetsitako proposamen horien bideragarritasuna aztertuko da, eta abenduan eta urtarrilean herritarrek proposamenak bozkatuko dituzte.

Attachments:

File	Description	File size	Created
AmurriokoEKIN eskuorria	AmurriokoEKIN eskuorria	646 kB	19-10-21 10:18

Programa honen helburua da Amurrioko enpresa txiki eta ertainei eta autonomoei laguntzea digitalizazio pertsonalizatuko eta indibidualizatuko ibilbide-orri edo plan bat lor dezaten. Enpresa bakoitzak berezitasun eta ezaugarri batzuk ditu, besteengandik bereizten dutenak, eta, horregatik, eraldaketa digitaleko prozesuak bakarrak dira. Programan parte hartu ondoren, enpresek digitalizazio arrakastatsua egiteko estrategia bat lortuko dute.

Programak 3 fase ditu:

1. Hasierako diagnostikoa, aholkulari espezializatu batekin banakako bilerak eginez. Diagnostiko horretatik abiatuta, ibilbide malgua eta enpresa bakoitzari egokitua ezarriko da.

2. Datozen hilabeteetan hainbat tailer labur egingo dira irakasleekin eta adituekin, eraldaketa digitalaren inguruko hainbat gai jorratzeko (diagnostikoetan ikusitako premien arabera egokituak). Tailer horien helburua enpresa parte-hartzaileen beharrak sentsibilizatzea, ikastea, hausnartzea eta lantzea da.

3. Inplementaziorako edo ibilbide-orrirako proposamena, eraldaketa digitala egin ahal izateko garrantzitsua, premiazkoa eta/edo beharrezkoa zer den ezartzea ahalbidetuko duena.

Programa honetan parte hartzeak ez dio inolako kosturik eragiten enpresari, Amurrio Bidean eta Amurrioko Udalak finantzatzen baitute. Baina plazak mugatuak dira eta beharrezkoa izango da enpresen profil espezifikoak (gerentzia, informatika, giza baliabideak, antolaketa, finantzak...) beren erantzukizun-eremuan eragina duten tailerretara joan ahal izatea, ikuspegi partekatua izateko eta diagnostikoa eta ibilbide-orria ahalik eta kontrastatuenak izan daitezen.

Programari buruzko informazio gehiago nahi izanez gero, webinar bat egongo da urriaren 28an, 10: 30ean. Parte hartu nahi izanez gero, honako inprimaki honetan eman behar da izena: https://forms.gle/UDdu9hNLcDFa7sVAA edo Amurrio Bidean-ekin harremanetan jarri 945891721 telefonoan edo posta bidez: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.

Euskadiko BetiOn telelaguntza-zerbitzuaren inguruko bi informazio-hitzaldi independente emango dira Amurrioko Kultur Etxean, urriaren 29an, 18:00etan, eta azaroaren 4an, 10:30ean. Zerbitzuaren oinarria pertsonan zentratutako eredua da, zeinaren bidez erabiltzaile bakoitzaren egoera baloratzen den, haren beharrak aztertzen diren eta prestazioak egokitzen diren haren ezaugarrietara. Gaur egun, 62.000 pertsona baino gehiagok erabiltzen dute zerbitzua Euskadin, eta 212k Amurrion.

Zerbitzua abian dago eguneko 24 orduetan eta urteko 365 egunetan. Erabiltzaileak terminala eta sakagailu pertsonala ditu etxean, eta azken hori etxe barruan gertatzen den edozein larrialdiren aurrean sakatu dezake. Zerbitzuak osasun-kontsultekin lotutako deiak osasun-zerbitzu publikora bideratzen ditu, eta hitzorduak kudeatzen dira osasun-zentroko lehen arretako medikuekin eta  erizainekin. Erorikoen arreta ere jorratzen da. Gainera, telelaguntza-plan pertsonalizatuaren arabera, jarraipen-deiak eta hainbat gairi buruzko informazio-kanpainak egiten dira (erorikoen prebentzioa, lapurreten aurreko neurriak, gripearen txertaketa-kanpaina, muturreko tenperaturak, etab.). Erabiltzailearen eta bere familiarren segurtasuna eta lasaitasuna bermatzeko, zerbitzuko langileek etxeko arriskuak eta erabiltzailearen egoera baloratuko ditu, eta teknologia gehigarria instalatzeko proposamena egin ahalko du (sua, kea eta gasaren detektagailuak, erorikoak, komunikatzeko zailtasunak dituzten pertsonentzako telelaguntza, etab.). Barne hartzen dira erabiltzaileak behar dituen gailu gehigarriak.

Hitzaldietan parte hartzeko izena ematea

Edukiera kontuan hartuta, informazio-hitzaldietan parte hartu nahi duten pertsonek izena eman ahalko dute adierazitako bi egunetako batean, Amurrioko Udalaren Gizarte Gaietarako Arloan (telefono-zk.: 945891161, 142 eta 146 luzapenak; edo helbide elektronikoa: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko..).

Attachments:

File	Description	File size	Created
Triptico.pdf	Telelaguntza-zerbitzuaren inguruko informazioa	1739 kB	21-10-21 09:44

Larunbatean hasiko da beste urte batez Amurrioko Udalak eta AHIZEk sustatutako “Eskatu euskaraz eta saria irabazi” kanpaina, Amurrioko denda, zerbitzu-enpresa eta tabernetan euskararen erabilera sustatzeko asmoz. Kanpaina azaroaren 14ra arte luzatuko da.

Ekimenak 25 parte-hartzaile izan ditu aurten, eta 100 sari baino gehiago emango ditu bezeroen artean banatuko diren 3.165 txartelen artean. Parte hartzea oso erraza da, kanpainarekin bat egiten duten establezimenduetan euskara erabiltzen duten bezeroen artean banatuko dira txartelak.

Txartel batzuek zuzeneko sariak izango dituzte, deskontuak edo opariak, besteak beste, baina sarituak izan ez direnek euskara plana osatzen duten saltokietan kontsumitu beharko den 300 euroko bonu baten zozketan parte hartzeko aukera izango dute. Kanpaina azaroaren 14an amaituko da, eta hurrengo egunean, 15ean, zozketa egingo da.

Parte hartzen duten establezimenduak: Maritierra Jakiak, Arregi Argazkilariak, Arkune, Batzokia, Adigrafik, Bi Oin podologoak, Burutxaga Harategia (Mendiko kalea), Autsiki Albaitaritza Zentroa, Basualdo Kirolak, El Rinconcito, Selene Fruta-denda, Gancedo Moda-denda, Lur Belar-denda, La Rana Turquesa puerikultura, Lilura Haur moda, Josu Optika, Luyando Optika, Goxoa Okindegia, Otarte Okindegia, Marta Gozo-denda, SAU garaikurrak, Txoko Gorri , Txotis , Aranoa Oinetako-denda eta Amurrioko Udala.

Euskaraz Bizi Nahi Dut Eguna

Kanpainaren hasierarekin batera, larunbatean Euskaraz Bizi Nahi Dut Eguna 2021 ospatuko da. Horretarako, besteak beste, tailerrak, jolasak eta kalejira antolatu dira.

11:00etatik 13:00etara: Tailerrak Aspaltzarekin.

12:00: Zuhaitz landaketa parkean. (PIRRITX ETA PORROTXEN ZUHAITZA).

12:00 Txistularien Kalejira.

11:30etik 13:00etara Betiko Jolasak eta Kalaka

13:00 Kantu Kolore ikuskizuna San Antonen.

16:30 Ihes Gela Kultur Etxean.

17:00etatik 18:30era Zunba Izaskun del Cerrorekin.

19:00 Ugarte Otxotea.

Haurren jaiotza edo adopziorako 2020ko laguntzak

 Azaroaren 5era arte eskatu ahalko dira Amurrioko Udalak 2020an seme-alabak jaio edo adoptatzeagatik ematen dituen laguntzak. Herritarren arreta-zerbitzuan edo webgunearen (www.amurrio.eus) egoitza elektronikoan aurkeztuko dira. Azken 10 urteetan 5 urtez Amurrion erroldatuta egon diren (horietako bat gutxienez etenik gabe eta zehazki jaiotza- edo adopzio-dataren aurretik) gurasoek eskatu ahalko dituzte. Familia-unitateak ezingo du gainditu 20.000 euroko muga PFEZren zerga-oinarrian. Ezinbestekoa da eskatzailearen familia-unitate osoa Amurrion erroldatuta egotea jaiotzaren edo adopzioaren unean.

Zaurgarritasun-egoeran dauden herrialdeetako adingabeak udan hartzeko programen 2021eko dirulaguntzak

Azaroaren 5era arte irekita egongo da deialdian eskaerak aurkezteko epea. Xedea da muturreko zaurgarritasun-egoeran dauden herrialdetatik datozen adingabeak udan hartzeko programaren 2021eko dirulaguntzak ematea. Herritarren arreta-zerbitzuan edo webgunearen (www.amurrio.eus) egoitza elektronikoan aurkeztuko dira.

 Bi harrera-modalitate egongo dira: bat oporraldietan zehar irabazi-asmorik gabeko erakundeen harrera-programen bidez, eta bestea adingabeen harrera-epe zabalagoetarako,  baldin eta aurreko programetan parte hartu ondoren Amurrioko familiek harrera sustatzen badute. Programaren helburua da adingabeen ongizatearen eta herritarren artean elkartasun-kultura sortzearen alde egitea, elkarteek, erakundeek eta irabazi-asmorik gabeko beste entitate batzuek lagunduta, eta familiek sustatutako eta arrazoi humanitarioengatik egindako harreran kasuan, Administrazio eskudunak lagunduta.