Amurrioko Udalak bira esanguratsua eman zuen adineko pertsonei loturiko politiketan 2016eko uztailaren 28an egin zuen osoko bilkuran; izan ere, bilkura hartan aho batez erabaki zuen “Euskadi Lagunkoia” proiektuarekin bat egitea. Euskadi Lagunkoia proiektua Eusko Jaurlaritzaren Enplegua eta Gizarte Politikak Sailak sustatzen du eta honako helburu hauek ditu:

• Parte-hartze komunitarioko prozesuak sortzea.
• Udalerriko eskumen-arloetan aldaketak egin daitezela ahalbidetzea, herritarren bizi-kalitatea hobetze aldera.
• Adineko pertsonek udalerrietan ongizatea sortzeko duten gaitasunari etekina ateratzea.
• Euskadin lagunkoitasun-ekimenen sare bat sortzea, OMEk ezarritako lan-metodologiari eta lau faseko zikloari (plangintza, ezarpena, ebaluazioa eta etengabeko hobekuntza) jarraikiz.

Une horretatik aurrera, adineko pertsonen bizi-baldintzak hobetzera bideratutako ekimenen artean, Adinekoen Kontseilu Sektorialaren sorrera azpimarratu beharra dago, bai eta kontseilu horren antolaketa- eta funtzionamendu-araudia garatu izana ere (2019ko azaroaren 28ko osoko bilkuran). Kontseilu hori herritarrei parte hartzeko aukera ematea xede zuen kontsulta-organo gisa sortu zen, eta adineko pertsonei dagokienez sortuz doazen beharrizan berriei erantzuteko konponbideak aurkitzea, informazioa komunean jartzea eta trukerako bidea irekitzea ditu helburu. 

Kontseilua, kontsulta-organo bat den heinean, aurrerapauso nabarmena da kolektibo horren parte-hartzeari dagokionez. Esperientzia-kapital erraldoia berreskuratu eta gizartearen zerbitzura jarri du, parte-hartzearen bitartez. Era horretan, pertsona horien bizi-kalitatea eta ongizate orokorra hobetu ahal izango da.