berriak

• Hitzarmenari esker, institutuko ikasleek jarduera artistikoak egin ahal izango dituzte udal-espazio batean, haien parte-hartzea eta autonomia bultzatzeko

Amurrioko Udalak Zaraobe Institutuarekin lankidetza-hitzarmena sinatzea onartu du, hezkuntza-premia bereziak dituzten ikasleek pintura-tailerraren erabilera errazteko.

Akordioaren helburua da ikasle horien eskura espazio egoki bat jartzea jarduera artistikoak eta hezitzaileak garatzeko, beren garapen pertsonala, sortzailea eta soziala bultzatzen duten proposamenetan parte har dezaten lagunduz.

Esparru horretan, Zaraobe Institutuak Gela Egonkor bat du, hezkuntza-baliabide espezifiko bat, laguntza mota hori behar duten ikasleen premiei egokitutako arreta inklusiboa eta pertsonalizatua eskaintzeko. Hitzarmenari esker, pintura-tailerra gela egonkorrean egiten diren jardueretan sartu ahal izango da, eta ikaskuntzarako eta bere gaitasunak garatzeko erabilgarri dauden espazio eta baliabideak zabalduko dira.

Lankidetza horren bitartez, ikasleek Arte Eskolako instalazioak erabili ahal izango dituzte beren prestakuntzaren baliabide osagarri gisa, eta adierazpen artistikoari lotutako hainbat jarduera garatu ahal izango dituzte beren beharretara egokitutako ingurune batean.

Monika Arbaiza Hezkuntza zinegotziak horrelako elkarlanen garrantzia nabarmendu du: “Udal baliabideak herritar guztien zerbitzura egotea nahi dugu, eta hezkuntza premia bereziak dituzten ikasleen ikaskuntza eta parte-hartze guneak ere izan daitezela. Hitzarmen honek hezkuntza inklusiboago batean aurrera egiteko aukera ematen digu eta gazte hauen sormena eta autonomia garatzeko aukera berriak eskaintzen dizkigu”.

Hitzarmenak Amurrioko Udalak inklusioarekin eta aukera-berdintasunarekin duen konpromisoa islatzen du, baita udalerriko ikastetxeekin lankidetzan aritzeko borondatea ere, ikasle guztiek Amurrioko gizarte eta cultura bizitzan parte hartzea erraztuko duten baliabideak eta espazioak sortzeko.

Horrela, bi erakundeen arteko lankidetzak aukera ematen du udal-baliabideak hezkuntza-eremura hurbiltzeko eta ikuspegi inklusibo batetik kulturarako eta sorkuntza artistikorako sarbidea sustatzeko.

Larunbat honetan Amurrion Euskaraz Bizi Nahi Dut Eguna ospatuko da. Horretarako, kirol-, kultura- eta aisialdi-jarduerak antolatu dira, 10:30ean hasi eta arratsaldera arte luzatuko direnak.
Larunbaterako programazio osoa:

10:30-13:00 Krosfita euskaraz, “Gorobel Crossfit”-en eskutik. Izen ematea kultura etxean eta egunean bertan 10:00-10:30 bitartean.

11:00 Euskaraldiaren photocall-a

10:00-11:00 Ipar martxa, hastapena, herriko plazatik, Izaskun Bengoaren eskutik. Izen ematea kultura etxean.

11:00-13:00 Ipar martxa, herriko plazatik.

11:00-13:30 Kalakaren egurrezko jolasak.

11:30-13:30 Bubble puxika erraldoien barruan ibiltzeko tailerra.

12:00 Txistularien emanaldia, Amurrioko txistuzaleen eskutik.

13:30-15:00 Kantukalejira tabernetatik, KARRAKAN taldearen eskutik.

15:00 Herri bazkaria (marmitakoa, barazki lasaña eta pantxineta). Tiketak 12€, kultura etxean.

16:30-18:30 Kontzertu partehartzailea, GURASOLEKU eta BERBALAGUNen eskutik.

16:30-18:30 Bubble puxika erraldoien barruan ibiltzeko tailerra.

18:30 MALEN ATXAren kontzertua.

• Ekimena Lehen Hezkuntzako ikasleei zuzenduta dago eta udalerriko lau ikastetxeetan 585 agenda banatzea aurreikusten du

Ikasturte berriaren hasierarekin batera, Amurrioko ikastetxeak Lehen Hezkuntzako ikasleen artean eskola-agendak banatzen hasi dira. Mendiko Eskolatik sortu zen ekimena, eta, ondoren, udalerriko gainerako ikastetxeetara zabaldu zen.

Amurrioko ikastetxe guztiei zuzendutako ekimena zenez, Udalak proposamenarekin bat egitea eta agenden kostuaren zati bat bere gain hartzea erabaki zuen, Lehen Hezkuntzako ikasleen artean banatu ahal izateko. Agendak joan den astean hasi ziren banatzen, ikasturtea hastearekin batera, eta guztira 585 agenda banatuko dituzte.

Ekimen honek ikasleei tresna erabilgarria ematen die eskolako lanak eta jarduerak antolatzeko eta planifikatzeko, eta, horrez gain, familiei eskolako egunerokotasunaren jarraipena egiten laguntzen die.

“Udaletik positiboki baloratzen dugu ikastetxeetako batean sortutako ekimen bat hezkuntza komunitate osora zabaldu izana. Amurrioko Lehen Hezkuntzako ikasle guztiei zuzendutako proposamena denez, garrantzitsua iruditzen zaigu bat egitea eta kostuaren zati bat bere gain hartuz laguntzea”, adierazi du Monika Arbaiza Hezkuntza zinegotziak. “Ikasleei euren zereginak antolatzen laguntzen dien tresna erraz eta praktikoa da, eta ikasturtean zehar baliagarria izan daiteke familientzat ere”, gaineratu du.

Ekimen horren bidez, Amurrioko Udalak udalerriko ikastetxeekin lankidetzan jarraitzen du, eta ikasleei eta hezkuntza-komunitateari zuzendutako jarduerak babesten ditu.

Amurrioko Udalak euskara ikasten lagunduko du aurten ere, urrian eska daitezkeen bi bekaren bidez. Udalak 25.050 euro bideratuko ditu euskara ikasteko edo aisialdiko begirale edo zuzendari titulua euskaraz eskuratzeko. Eskaerak Herritarrentzako Arreta Zerbitzuan aurkeztu beharko dira urriaren 31 baino lehen.

Beka deialdi horren helburua Amurrioko bizilagunen artean euskara sustatzea da. 2021-2022 ikasturtean 23.000 euroko partida duen hizkuntza ikasteagatiko bekaren kasuan, ordaindutako matrikularen % 75erainoko diru-laguntza emango da. Eskatzaileek 16 urtetik gorakoak izan eta Amurrion erroldatuta egon beharko dute. Gainera, gutxienez %80ko asistentzia egiaztatu beharko dute HABEk homologatutako zentro batek emandako ziurtagiriaren bidez.

Aisialdiko begirale edo zuzendari titulua euskaraz ikasteko bekaren kasuan, 2.050 euroko partida bideratuko da, eta ordaindutako matrikularen eta egonaldi-gastuen % 50 lagunduko da diruz.

Eskatzaileek Amurrion erroldatuta egon beharko dute, eta ikastaroa amaituta eta titulua 2022an, urriaren 1a baino lehen, lortuta izan beharko dute. Era berean, ikastaro osoa euskaraz egin beharko da, eta gutxienez 150 ordu jaso beharko dira alde teorikoan. Laguntza eskatzeko, eskabide-orriarekin batera, egindako ordainketaren egiaztagiria eta aisialdi-eskolak emandako bertaratze-ziurtagiria aurkeztu beharko dira.

Attachments:

File	Description	File size	Created
Begirale/Zuzendari ikastaroko beka	Begirale/Zuzendari ikastaroko beka	293 kB	04-10-22 10:26
Euskara beka	Euskara beka	304 kB	04-10-22 10:25

• Bi proposamenek udalerriko prestakuntza kulturalaren eskaintza indartzen dute, adin guztiei zuzendutako tailer eta irakaskuntza artistikoen bidez

Amurrioko Udalak 2026-2027 ikasturterako izena emateko epea ireki du Juan Aranoa Udal Arte Eskolan eta Udal Dantza Eskolan. Bi horiek udalerriko kultura eta hezkuntza eskaintzaren bi zutabe dira, eta prestakuntza artistiko irisgarria, askotarikoa eta adin guztietara egokitua eskaintzen dute.

Juan Aranoa Udal Arte Eskolak sormen tailerren programazio zabala aurkezten du, pintura, zeramika, joskintza, larrua, zura lantzea, titakadura, argazkigintza, bideoa eta antzerkia bezalako diziplinak biltzen dituztenak, euskaraz eta gaztelaniaz, eta astelehenetik larunbatera ordutegi desberdinak.

Aurtengo berrikuntza nagusiak hauek dira: haurrentzako joste-tailerra eta ehunen birziklapena 7 eta 12 urte bitarteko haurrentzat, eta argazkigintza eta bideo ikastaro bat smartphonearekin eta adimen artifizialarekin, ikus-entzunezko sorkuntzari aplikatutako tresna digital berriak dituena.

“Amurrioko kultur eskaintzak ikasteko, sortzeko eta partekatzeko gune irekia izaten jarraitzea nahi dugu. Proposamen berri horiek tradizioa eta berrikuntza uztartzen dituzte, eta, horiei esker, adin guztietako pertsonek sormena garatzeko eta adierazpen artistikoak egiteko eremu bat aurki dezakete”, azpimarratu du Naiara Barallobre Amurrioko Udaleko Kultura zinegotziak.

Matrikulazio epea 2026ko ekainaren 15etik irailaren 13ra arte egongo da irekita, online edo Kultur Etxean bertan egin ahal izango delarik. Prezioak desberdinak dira ikastaroaren arabera, familia ugarientzako deskontuekin eta familiaren egoera ekonomikoaren arabera egin daitezkeen murrizketa gehigarriekin.

Bestalde, Amurrioko Udal Dantza Eskolak ere izena emateko epea irekitzen du, 2026ko irailaren 18ra arte, maila eta adin desberdinetara egokitutako prestakuntza progresiboa eskainiz. Taldeen eta ordutegien behin betiko eraketa matrikula kopuruaren eta eskolaren beraren antolaketaren araberakoa izango da.

Matrikula tasa 40,29 eurokoa da, ordainketa bakarrean ordaindu beharrekoa; hilekoak, berriz, prestakuntza mailaren arabera ezartzen dira: 60,41 euro dantza hastapenerako, 67,16 euro dantza mailarako eta 33,57 euro pertsona helduentzat. Gainera, 0 hastapeneko doako ikastaro bat eskaintzen da 4 eta 5 urteko ikasleentzat, mugimendurako eta gorputz-adierazpenerako lehen hurbilketa ludiko gisa pentsatua.

Hilekoak banku-helbideratze bidez ordaintzen dira, hilabetea amaitu ondoren. Bajaren kasuan, idatziz eskatu beharko da Amurrioko Udalean, eta hilabete osoa kobratuko da baja hasita dagoenean.

Halaber, % 30eko hobariak aurreikusten dira familia ugarientzat, matrikula egiteko unean egiaztatu ondoren.

Eskaintza honekin, Amurrioko Udalak indartu egin du hezkuntza artistikoarekin eta kulturarekin duen konpromisoa, bai eta diziplina sortzaile eta eszenikoetan trebatzeko berdintasunezko sarbidea ere.

Larunbat honetan hasiko da Amurrioko Udalak eta AHIZEk bultzatutako “Eskatu euskaraz eta saria irabazi” kanpaina, Amurrioko denda, zerbitzu-enpresa eta tabernetan euskararen erabilera sustatzeko helburuarekin. Kanpainak maiatzaren 29ra arte iraungo du.

Aurten 28 parte-hartzaile batu dira ekimenera, iaz baino 3 gehiago, eta ehun sari baino gehiago banatuko dira establezimenduetako bezeroei emango zaizkien 3.357 txartelen artean. Parte hartzea oso erraza da, txartelak kanpainarekin bat egin duten establezimenduetan euskara erabiltzen duten bezeroen artean banatuko dira.

Txartel batzuek zuzeneko sariak izango dituzte, beherapenak edo opariak, baina saririk jaso ez dutenek 300 euroko bonu baten zozketan parte hartzeko aukera izango dute, euskara planean parte hartzen duten saltokietan gastatzeko. Txarteletan saritutako ‘Irabazi euskararekin’ poltsak Kultur Etxean jaso beharko dira astelehenetik ostiralera 9:00etatik 13:30era eta 16:00etatik 20:00etara, eta larunbatetan 10:00etatik 14:00etara. Kanpaina maiatzaren 29an amaituko da, eta zozketa hurrengo egunean egingo da.

Establezimendu parte-hartzaileak: Maritierra Ellikagaiak, Arregi Argazkiak, Arkune, Batzokia, Adigrafik, Aiala II logelak, Burutxaga Harategia (Mendiko kalea), Autsiki Albaitaritza Zentroa, Basualdo Kirolak, El Rinconcito, Selene Fruta-denda, Gancedo moda denda, Lur Belar-denda, La Rana Turquesa puerikultura, Lilura haurrentzako moda, Josu Optika, Luyando Optika, Goxoa Okindegia, Otarte Okindegia, Marta Gozotegia, Albizabal Taberna, Guk Taberna, Frontoi Taberna, Txoko Gorri Taberna, Txotis Taberna, Aranoa Zapata-denda eta Amurrioko Udala.