Instrumentu tradizionaletan sustraitutako eskola gisa ulertu behar da Amurrioko Musika Eskola. Gainera, bertako instrumentuen (jatorri autoktonoko soinu tresnen) eskaintza anitza du; hau da, trikitixa, panderoa, txalaparta, danborra, herri perkusioa, alboka eta dultzaina. Musika ikasketetarako proposamen hau, aurrez finkatuta dagoen errealitate batetik dator, hots, aurreko trikitixa eta panderoaren udal eskolatik, eta ohiko musika eskola planteatzeko beharraren eskaerari emandako erantzuna da.

Eskolak emateko metodologia banakakoa edo taldekoa da:

Instrumentuen banakako klaseak: Eskola mota honetan espezialitate guztiak eman ahal izango dira; trikitixa, panderoa, txalaparta, danborra, herri perkusioa, alboka eta dultzaina. Berrogeita bost minutuko iraupena planteatzen da, banakako hogeita hamar minututan eta partekatutako hamabost minututan bereizita. Arrazoi pedagogikoengatik, hamabost minutu horiek antzeko adineko eta mailako beste ikasle batekin partekatzea sustatzen da. Adina, prestutasuna edota ikaskuntza maila medio beste ikasle batekin ezin bada egokitu, banakako berrogeita bost minutuak mantenduko dira.

Soinu tresnaren klase partekatua: eredu honetan panderoa, txalaparta, danborra eta herri perkusioa espezialitateak irakatsi ahal izango dira. Berrogeita bost minutuko iraupena planteatzen da eskoletan. Gehienez ere sei kide egon ahalko dira instrumentu, adin edota ikas maila bakoitzeko.

Taldekako klaseak: berrogeita bost minutuko iraupena planteatzen da, eta taldeak sei lagun baino gehiagokoak izan beharko dira. Multzo horietan askotariko instrumentuak, adinak edota ikas mailak integratzen dira, irakaskuntza pertsonalizatutik soinu tresna multzoen beharrari erantzuteko asmoz, musika irakaskuntzaren berezko elementu gisa.

Herri Musika Eskolak Kultura Etxean du egoitza (Landako 8, Tel.: 945 891 450).