Amurriok ‘Bizitza basoetan’ erakusketa hartuko du urtarrilaren 23ra arte La Casonan

Ostiraletik aurrera, Amurrioko La Casonan Muskerrak ingurumen elkarteak antolatutako ‘Bizitza Basoetan’ lehiaketan saritutako argazkien erakusketa izango da ikusgai. Erakusketaren gaia animaliak, landareak, onddoak eta horiek gure basoetan dituzten portaerak dira, eta urtarrilaren 23ra arte ikusi ahal izango da.

‘Bizitza Basoetan’ ekimena Muskerrak ingurumen elkarteak jarri du martxan, Eboluzioari buruzko Europako Elkartearekin eta Amurrioko Udalarekin elkarlanean, baso naturalek eta haien kontserbazioak tokiko biodibertsitaterako duten garrantzia ezagutarazteko.

Erakusketak bost egileren argazkiak erakutsiko ditu: Xabier Ramos, Gustavo Abascal, Oier Virizuela, Enrique Arberas eta Maider Iglesias-Carrasco. Erakusketa asteartetik ostiralera 10:00etatik 14:00etara eta 17:00etatik 19:00etara eta larunbat eta igandeetan 10:00etatik 14:00etara bisitatu ahal izango da.

 

Amurrioko Udalak topaketa bat antolatu du herriko kultur eta sormen sektorea entzuteko

Amurrioko Udala Kulturaren Plan Estrategikoa diseinatzen ari da, eta plan horrek ezarriko ditu datozen 10 urteetan eremu horretan gauzatu beharreko jarduketen oinarriak. Dokumentuaren helburu nagusietako bat, herriko kultur bizitzaren sortzaile, ikusle, parte-hartzaile eta erabakitzaile izango diren herritarrak sortzen lagunduko duten lan ildoak definitzea izango da. Horrez gain, Planak, Amurrio eskualdeko kultura-erreferente gisa sendotzeko eta kulturaren balioa nabarmentzeko ideiak proposatuko ditu, beste sektore batzuekin, gizartearekin, hezkuntzarekin edo garapen ekonomikoarekin, besteak beste, bat egiteko ahalmena duen eremu gisa.

Lan-esparru horretan, ezinbestekoa da plan estrategikoak kulturaren eta sorkuntzaren sektorean lanbide-jarduera garatzeko testuinguru egokia sortzen laguntzea. Ildo horretan, orain arte, Udalak lan-bilerak egin ditu herriko prestakuntza artistikoko eskolekin eta bertako kultur ekipamendu nagusiekin. 

Orain, prozesuari buruzko xehetasun gehiago jakiteko eta ekarpenak egiteko interesa duten gainerako eragileekin biltzeko txanda iritsi da. Horretarako, Udalak kontrasterako bilkura irekia deitu du. Hitzordua urriaren 20an, asteazkenean, izango da, Amurrio Antzokian, 19:00etan. Bertan, Planaren oinarriak eta garapenerako ildo nagusiak azalduko dira, eta, aurkezpenaren ondoren, dinamika bat ezarriko da, parte hartzen duten eragileek zalantzak argitu eta ekarpen orokorrak egin ahal izan ditzaten. Ondoren, topaketa hainbat lan-mahaitan antolatuko da, eta mahai horien helburua honako arlo hauetan jorratu beharreko erronka nagusiak agerian jartzea izango da: esperimentazio artistikoari laguntzea, sorkuntza, erakusketa, audientzien garapena, ekintzailetza eta enpresa, prestakuntza, balioa ematea eta komunikazioa, edo beste jarduera-sektore batzuekin bat egitea.

Parte hartu nahi izanez gero, 945 89 11 61 - 132 Luz. telefono zenbakian edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbide elektronikoan eman beharko da izena, urriaren 15era arte.

 

 

Amurriok Antzokirako fidelizazio kanpaina bultzatu du

Amurriok aurten ere herriko bizilagunak Antzokira fidelizatzeko kanpainari ekingo dio, arte eszenikoak herrian zabaltzeko helburuarekin. Horretarako, Zinebonoak 2022 izeneko zinema-bonuak jarriko dira salgai eta Amurrio Antzokiko bazkide txartela eskuratzeko aukera egongo da. Gainera, datorren urtean Gazte Txartela duten gazteek 2 euroko beherapena izango dute zuzeneko ikuskizunetan.

Zinema

Datorren urtean zinemarako sarrerek prezio bera izango dute, umeentzako eta ikus-entzulearen eguneko saioek 3,75 euro, eta helduen saioak 5 euro. Bestalde, zinema emanaldiak igandeetan 17:30ean izango dira umeentzat eta 19:30ean helduentzat, eta astelehenetan, ikus-entzulearen egunean, 20:00etan.

Zinema zaleek, titularrari Antzokian programatzen diren lau zine saioetarako sarbidea ematen dioten Zinebonoa erosi ahal izango dute. 2020an eskuratutako zinebonoak ez dira iraungiko, 2022rako aurreikusitako Zinebono digitala martxan jarri arte egongo dira indarrean. Zinemako sarreren eta Zinebonoaren online salmenta egin daitekeenean, trukatu gabeko zinebonoa paperean dutenek ez dituzte saioak galduko, zinebonoa sistema berrian emango zaizkie.

Bonuek iazko 12,55 euroko prezio bera izango dute eta Kultur Etxean eta Amurrio Antzokiko leihatilan erosi ahal izango da.

Egin zaitez bazkide

Antzokiaren beste apustuetako bat bazkideen bidezko fidelizatze-kanpaina da. Horrek hainbat abantaila ematen dizkie erabiltzaileei, ohikotasunez zuzeneko ikuskizunetara joan ahal izan daitezen. Datorren urtean Antzokiko bazkideek % 15etik % 35era bitarteko beherapenak izango dituzte zuzeneko ikuskizunetarako sarreren erosketan.

Zuzeneko ikuskizunetako sarreretako beherapenez gain, bazkideek lehentasuna izango dute horiek erosteko orduan, sarrerak bazkideei saltzeko egunak ezarriko baitira. Horrez gain, Zinebono bat jasoko dute eta Amurrio Antzokiaren informazioa posta elektroniko bidez bidaliko zaie. Bazkide txartelaren prezioa 2022rako, iaz bezala, 21 eurokoa izango da.

“Summer time - Kiss me”, “Staged landscape nº1” eta “No quiero despertar. El orgasmo” Amurrioko XXXV. Lehiaketa Artistikoa irabazi duten lanak

Amurrioko Udalak antolatutako Amurrio Hiria 2021 XXXV. Lehiaketa Artistikoak baditu irabazleak. Guztira, epaimahaiak baloratu dituen 59 lan aurkeztu dira aurtengo ediziora.

Lehiaketako lehen saria “Summer time - Kiss me” lanari eman diote, David Anocibar Arroqui iruindarraren mihise gaineko olio diptikoa. 4.000 euro eta eskultura oroigarri bat jasoko ditu. Epaimahaiak egilearen trebezia eta gaitasun teknikoa baloratu ditu, lan erakargarria osatuz, terminoaren esanahi zorrotzean, bai formatuari dagokionez, maisutasuna erakusten duten pintzelkada eta kolore-aukeraketarekin, bai gaiari dagokionez, aldi berean ikuslea deitzen eta aipatzen duen narrazio iradokitzaile batean oinarrituz.

“Staged landscape nº1” lanak, Gert Voor in 't Holt argazkilariaren fujicolor archive paperaren gainean positibatutako argazki digitalak, jaso du 1.500 euroko bigarren saria. Ofizioa erakusten duen argazkiaren zuzentasun nabariaz haratago, epaimahaiak ekintza, denbora, proposamen bat ikusi du lan horretan, lana zentratzen duen argizko laukizuzenean. Agertzen den eszenaratzeak, aldi berean, ekintzaren eta, beraz, mugimenduaren, promesa dakar. Argazkiak denbora du. Marko natural baten erdian dagoen argi-laukizuzenaren artifizialtasunak, gurutzatzen diren zuhaitzek proposatutako agertokian oztoporik jarri gabe, iradoki egiten du, eta, aldi berean urduritasuna sortzen du.

Herriko biztanleei zuzendutako saria, 1.000 eurokoa, Salvador Castañeda Hernándezek jaso du, paper gaineko “No quiero despertar. El orgasmo” injekzio-inpresioarekin. Bertan, autoreak giro psikologiko, trinko eta iradokitzailea osatzeko duen gaitasuna baloratu du epaimahaiak.

Epaimahaia osatu dutenak hauek izan dira: Charo Diéz Garaigorta, Arabako Artium Museoko hezkuntza eta kultur ekintza prozesuaren eta berrikuntza prozesuaren arduraduna; Edurne González, EHUko kultura hedapeneko dekanordea eta Arte Ederretako fakultateko eskultura eta arte eta teknologia irakaslea; eta Mikel Onandia, artearen historialaria eta EHUko artearen eta musikaren historia saileko irakaslea.

Erakusketa La Casonan

Gaur, 19:00etan, La Casonan egingo den sari banaketaren ondoren, urriaren 28ra arte ikusgai egongo diren 20 lan hautatuen erakusketa inauguratuko da.  

Amurrio Hiriko XII. Gabon kanta erronda

Erronda Amurrion burutuko da 2021eko Abenduaren 23an, astelehena, arratsaldeko 6etatik aurrera. Gabon Kanta Lehiaketarako izen ematea dohainik da eta Amurrioko Kultur Etxean edo 945891450 telefonoan egingo da, azaroaren 15tik abenduaren 13ra. Izen ematearen epea bukatu eta gero, koro bakoitzari adieraziko zaio parte hartzeko leku eta orduak.

 

Attachments:
FileDescriptionFile size
Download this file (2021eko Gabon kanta lehiaketaren oinarriak.pdf)OinarriakOinarriak54 kB

Oraindik izena eman dezakezu Amurrioko Udal Dantza Eskolak antolatutako campusean

Uda ostean helduko den ikasturtearen hasiera berritasunez beteta etorriko da Amurrioko Udal Dantza Eskolan. Lehena, ‘Sartu dantzaren munduan’ campusaren antolaketa izan da, irailaren 13tik 24ra, eta bertan dantzaren inguruko hainbat jarduera egingo dira.

Campusaren antolakuntzak Udal Dantza Eskolaren ateak irekiko dizkie herritarrei, bere jarduera ezagutzera emateko eta dantzarekiko interesa modu atsegin eta dibertigarrian pizteko. “Dantzak erakartzen dituen arren inoiz klaserik jaso ez duten 5 eta 18 urte bitarteko ume eta gazteei egindako deia da”, azaldu du Jon Ugarriza eskolako zuzendariak.

Campusean emango diren jardueren artean, ballet, koreografia, coaching, balleteko eta ikuskizunetako jantzi edo familian dantzatzeko teknikak daude. Parte-hartzaileen adinaren araberako lau talde ezarri dira: 5-7 urte bitarteko A taldea, 8-10 urte bitarteko B taldea, 11-13 urte bitarteko C taldea eta 14-18 urte bitarteko D taldea.

Ekimen berri hori bi astetan egingo da, irailaren 13tik 17ra eta irailaren 20tik 24ra, arratsaldez, 17:00etatik 20:15era, taldeen arabera. “Dantzaren munduan murgiltzeko une egokia da hau, izan ere, bi astez, parte-hartzaileek etorkizuneko prestakuntzan lagungarri izango zaizkien alderdi garrantzitsuak ezagutzeko aukera izango dute”, adierazi du Ugarrizak.

Izena irailaren 1etik aurrera eman ahal izango da Amurrioko Kultur Etxean. Matrikularen prezioa 22,12 eurokoa da udalerrian erroldatutako ikasleentzat eta 36,87 eurokoa erroldatu gabeentzat.