berriak

Arabako Txakolina elkarteak Txakolin Egunaren hogeita hirugarren edizioa ospatuko du ekainaren 4an Amurrion. Dagoeneko finkatuta dagoen ekitaldi horri esker, aurten ere Arabako produktuak sustatu ahal izango dira. Juan Urrutia parkean Arabako Txakolina Jatorrizko Deituraren barruan dauden zazpi upategik ekoitzitako txakolin onenak bilduko dira.

Txakolin Egunak José Antonio Merino Cañamero izango du aurten enbaxadore. Euskal estiloko tabernen proiektu onenetako baten sustatzailea eta arima da Espainia osoan (PerretxiCo Taldea), eta txakolinaren eta, zehazki, arabarraren defentsa darama bere DNAn. Izendapena ekainaren 4an egingo da, 11:30ean, Amurrioko Udaletxeko Osoko Bilkuren Aretoan. Ekitaldian 2022ko mahats-bilketaren aurkezpena ere egingo da. Udaletxean amaitu ondoren, jai-esparruaren inaugurazioari ekingo zaio, jaiaren hasierako txupinazoarekin, 12:00etan.

Barrutian, 2022ko mahats-bilketaren dastaketaz gozatu ahal izango da, baita askotariko eskaintza gastronomikoaz ere, pintxoak eta errazioak, besteak beste. Pintxo eta errazio horiek gune gastronomikoaren sarreran horretarako prestatutako standean erositako tiketen bidez eskuratu ahal izango dira. Standa 16:00ak arte egongo da zabalik. Tiketak txakolidealava.eus webgunearen bidez ere eskuratu ahal izango dira, eta, berritasun gisa, aurten QR kode baten bidez erosi ahal izango dira webgunean, programan eta karteletan.

Hori guztia herriko produktu artisauen erakusketa eta salmentarekin, Otxote Ugarte kalejirarekin eta Falzue izenekoarekin, txakolin hotzez egindako rebujitoarekin, osatuko da. Aurten, berrikuntza gisa, erromeria 17:00etatik 20:00etara izango da Akerbeltz erromeriaren eskutik.

Antolatzaileek autobus zerbitzua ere jarri dute Gasteiztik festara joateko (irteera 11:00etan Corte Inglesetik eta itzulera 19:30ean Amurriotik). Txartelak ekainaren 2ra arte salduko dira, ostirala, Arabako Txakolinak Gasteizko Abasto Plazan duen Txakolipintxo postuan.

Txakolin Egunarekin batera

Izan Amurrio merkatari eta ostalarien elkarteak, Amurrio Bidean elkartearekin elkarlanean, jarduera berezi batekin egin du bat aurten Txakolin Egunarekin. Udalerriko bi saltokik Arabako txakolin dastaketak egingo dituzte aurreko egunetan. Lehenengoa maiatzaren 26an izango da, 19:00etan, “Ecomobelen”, eta ekainaren 2an, 19:00etan, “Azules viste tu vidan”. Plazak mugatuak direnez, interesatuek aldez aurretik eman beharko dute izena Izan Amurrion, 670497108 telefono-zenbakian edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbide elektronikoan.

      Datorren larunbatean, 2023ko maiatzaren 13an, ITZULIA WOMEN 2023 txirrindularitza lasterketa iritsiko da Amurrioko udalerrira. Lasterketa Elexondo kalean amaituko da, Landako, Aiara eta Aldai kaleekin elkargunean.
      Horrek guztiak hainbat gorabehera eragingo ditu trafikoan, eta Amurrioko herritarrek hainbat neurri hartu beharko dituzte, batez ere ibilgailuen mugikortasunaren aldaketekin lotuta.

      Herritarrek kontuan hartu eta hartu beharreko neurrien artean honako hauek daude:

1.-Debekatuta dago ETXEGOIENBIDEA kale osoan edozein ibilgailu mota aparkatzea 2023ko maiatzaren 13ko 07: 00etatik aurrera.

2.- ELEXONDO kaleko 2,4 eta 6 zenbakietako garaje pribatuetara sartzeko eta irteteko debekua, 2023ko maiatzaren 13ko 11:00etatik 16 00etara bitarteko ordutegian.

3.- Debekatuta dago 2023ko maiatzaren 13ko 07:00etatik aurrera La Iglesia izeneko aparkaleku publikoan (ARABA kalea) edozein ibilgailu mota aparkatzea. Debekatuta dago, halaber, Araba kaleko Elizako biribilgunetik Armurubenta kalearekiko elkarguneraino doan zatian aparkatzea.

4.- BAÑUETAIBAR kaleko 2., 4. eta 6. zenbakien eta kale bereko 32. zenbakitik 36. zenbakiaren artean edozein ibilgailu mota aparkatzeko debekua, 2023ko maiatzaren 12ko 15: 00etatik aurrera.

5.- 2023ko maiatzaren 12ko 15:00etatik aurrera, Elexondo eta José Madinabeitia kaleen arteko bidegurutzean (Aiara kaleko 1,2,4, 6 zenbakietan), AIARA kaleko zatian edozein ibilgailuk aparkatzeko debekua.

      Hori dela eta, oro har jakinarazten da aginduak eman direla aparkatutako ibilgailuak garabi bidez erretiratzeko, eta ekitaldia behar bezala antolatu eta funtzionatzeko beharrezkoa den beste edozein bitarteko puntual hartzeko.

Maiatzaren 17an, ahotsa goratzen dugu (are gehiago) LGTBI pertsonen aurkako erasoak salatzeko eta pertsona bakoitzaren errespetuan eta askatasunean oinarritutako gizarte justua, berdintasunezkoa eta askotarikoa eskatzeko.

Argi dago indarkeria erabiltzeko modu asko daudela; LGTBI pertsonek badakite hori, eta egunero pairatzen dute. Eusko Jaurlaritzak diskriminazioaren aurka borrokatzeko bultzatzen duen ERABEREAN sarearen azken txostenaren arabera, sexu- orientazioagatiko eta/edo generoagatiko erasoak gure gizartean ohikoena den bigarren diskriminazio-modua dira. Toki-mailan, IKUSGUNEk – Vitoria-Gasteizko LGTBIfobiaren aurkako Behatokiak – zehazten du jasotzen diren eraso gehienak transfobiarekin lotuta daudela, eta horien salaketak esponentzialki areagotu direla.

Agerikoa da salaketak ugaritu izana LGTBI komunitateak urteetan jasan duen isiltasunaren isla baino ez dela. Horregatik, beharrezkoa da gure gizartean oraindik indarrean dauden diskriminazioen aurkako borroka sendotzen jarraitzea, askotan ikusezinak diren genero-identitate, -orientazio eta -adierazpen guztiak errespetatuz; gizarte osoaren erantzukizuna diskriminazio- eta indarkeria-mota guztien aurka borrokatzeko.

Berdindun hainbat gizarte-eragilerekin lan egiten dugu gizartea ikusarazten eta eraldatzen, eraso horiek guztiak saihesteko. 23 urte igaro dira OMEk homosexualitatea gaixotasuntzat hartzeari utzi zionetik, eta bost urte DSM-5ek (Ameriketako Estatu Batuetako Psikiatria Elkartearen Diagnostiko eta Estatistika Eskuliburua) transexualitatea buruko nahasmendu gisa ezabatu zuenetik.

Elkarteok, erakundeek eta gizartearen alderdi konprometituenak gogor eta aktiboki lan egiten dugu LGTBI pertsonek aurre egin behar dieten oztopo erantsiak ezabatzeko. Hamarkadak dira Eusko Jaurlaritza, Berdintasun, Justizia eta Gizarte Politiketako Sailaren bitartez, edozein diskriminazio ezabatzen saiatzen ari dela; Berdindu zerbitzua horren erakusle da.

Gaur maiatzaren 17a da. Eta gaur, urteko gainerako 364 egunetan egiten dugun bezala, gizarte hobea bultzatzeko eta sexu- eta genero-aniztasunarekiko gorrotoak eragindako erasoak salatzeko konpromisoa berresten dugu. LGTBIfobiarik gabeko gizarte baten alde!

Amurriok maiatzaren 7an egingo du bat apirilaren 29an ospatzen den Dantzaren Nazioarteko Egunarekin, Udal Dantza Eskolaren parte-hartzearen bitartez. Emanaldia Juan Urrutia plazan izango da eguerdiko 12:30ean.

Dantza erakustaldiaren protagonista, alde batetik, Udal Dantza Eskolako ikasleak izango dira, eta klaseko ariketen eta hainbat koreografiaren erakusketa bat taularatuko dute, “Intxaur-hauskailua”, “Chipollino”, “Lasaitasun”... besteak beste. Eskolak ibilbide sendoa du udalerrian, ikasleak dantzaren teknika ezagutzen eta bereganatzen hasteko lanean, sorkuntzarako duten gaitasunari ahalik eta etekin gehiena ateratzeko helburuarekin.

Amurriok programazio berezia izango du aurten maiatzaren 17ko LGTBIQA+Fobiaren aurkako Nazioarteko Egunean. Bertan, Bilboko Gaylesbitrans Nazioarteko Zinema eta Arte Eszenikoen 20. Jaialdiko film labur eta luzeen proiekzioa izango da.

Zinegoaken barruko proiekzioa maiatzaren 20an izango da, Amurrio Antzokian 20:00etan eta sarrera doakoa izango da leku guztiak bete arte.

Larunbat honetan hasiko da aurten ere AHIZE Hizkuntza Aholkularitzak Amurrion bultzatu duen eta Amurrioko denda, zerbitzu enpresa eta tabernetan euskararen erabilera sustatzea helburu duen “Eskatu euskaraz eta saria irabazi” kanpaina. Kanpainak maiatzaren 28ra arte iraungo du.

Aurten 24 establezimenduk egin dute bat ekimenarekin. Bertan ehun sari baino gehiago banatuko dira, establezimenduetako bezeroen artean banatuko diren 2.868 txartelen artean. Parte hartzea oso erraza da, kanpainari atxikitako establezimenduetan euskara erabiltzen duten bezeroen artean banatuko dira txartelak.

Txartel batzuek zuzeneko sariak izango dituzte, deskontuak edo opariak, baina saririk ez dutenek 300 euroko bonu baten zozketan parte hartzeko aukera izango dute, euskara plana osatzen duten saltokietan gastatzeko. Kanpaina maiatzaren 28an amaituko da eta 29an zozketa egingo da izena eman duten pertsona guztien artean.

Parte-hartzen duten establezimenduak: Adigrafik Komunikazio Agentzia, Albizabal, Amurrioko Udala, Aranoa oinetakoak, Arregi argazkilariak, Arkune, Autsiki albaitaritza zentroa, Ayala II, Basualdo kirolak, Biderdi, Burutxaga harategia (Mendiko kalea), Desvan, Gancedo moda denda, Frontoi, Goxoa okindegia, Guk, Lur belar-denda, Luyando optika, Marta gozotegia, Otarte okindegia, El Rinconcito, Selene frutategia, Txoko Gorri eta Txotis.