berriak

Abian da Beldur Barik Aiaraldea lehiaketa. Aurten antolatutako edizio berriaren helburua gazteen artean indarkeria matxistaren detekzioa eta prebentzioa lantzea da. Aurten, sari banaketa azaroaren 18an izango da, Amurrio Antzokian, 18:00etan.

Gazteek Beldur Barik jarrera erakutsi beharko dute ikus-entzunezko pieza baten bidez, bideoa YouTubera edo Vimeora igoz eta web inprimaki bat betez. Lehiaketan parte hartzeko epea azaroaren 11n amaituko da.

Parte hartu nahi dutenek lau kategoria hauetako batean parte hartzeko aukera izango dute:

1. kategoria: 2010 eta 2008 artean jaiotakoak (2022an 12-14 urte betetzen dituztenak).
2. kategoria: 2007 eta 2005 artean jaiotakoak (2022an 15-17 urte betetzen dituztenak).
3. kategoria: 2004 eta 2002 artean jaiotakoak (2022an 18-20 urte betetzen dituztenak).

Kategoria berezia. Lehen Hezkuntzako azken zikloa (Bigarren Hezkuntzarik ez duten udalerrietarako)

Sartu lehiaketan parte hartzeko oinarrietan: https://www.beldurbarik.eus/concurso so-local-beldur-barik-aiaraldea-2022

Amurrioko Udaleko Berdintasun Sailak hainbat hilabete daramatza lanean abuztuaren 12tik 17ra egingo diren herriko jaiei begira eraso matxistei erantzuteko protokoloa prestatzen. Landutako jarduketa-protokoloak eraso baten aurrean jarduteko oinarrizko zenbait jarraibide ezartzen ditu, eta tabernetan, txosnetan eta udalerriko hainbat leku estrategikotan egongo dira eskuragarri.

“Bi urte daramatzagu festak ospatu ezinik, eta badakigu jai-testuinguruak arau sozialak lasaitzen diren esparrua direla. Askatasunean, berdintasunean eta errespetuan gozatu nahi ditugu egun horiek. Ez dugu eraso matxistarik nahi, eta herritarrei inplikatzeko eta adi egoteko eskatzen diegu, Amurrion lekurik ez duten portaera mota horiek saihesteko”, adierazi du Ixone Saratxaga Berdintasun zinegotziak.

Gainera, jaietarako prestatu den programazioan Berdintasun Sailak bultzatutako jarduerak egongo dira. Aurten ere eraso sexisten aurkako stand informatiboa izango dugu Larrinaga kalean, abuztuaren 12an, 19:00etatik 22:00etara eta abuztuaren 14an 21:00etatik 24:00etara. Standean indarkeria matxistaren arloko profesionalak egongo dira zalantzak argitzeko, informazioa, aholkua eta laguntza eskaintzeko eta, behar izanez gero, zuzeneko arreta emateko.

Beste urte batez preserbatiboaren erabilera sustatzeko, jaiekin bat egiten duen Gehitu zerbitzuaren laguntza ere izango dugu. Kanpaina horren helburua txosnetan eta jai-esparruetan osasunari eta prebentzioari buruzko informazioa banatzea da. Liburuxketan bildutako preserbatiboak banatuko dira. Horrela, erabiltzearen garrantziari buruzko informazioa emango da.

Beste jarduera bat, abuztuaren 13an, escape room-a izango da. Bertan, berdintasunaren bidera iristeko ebatzi beharko diren hainbat jolas egingo dira.

Azkenik, Udalak musika sexista baztertzeko, eta jaietan berdintasuna sustatzen duen musika bultzatzeko proposamen ez-sexistak dituen kantu-zerrenda egin du, eta tabernetara, txosnetara eta barraketara eramango ditu.

Amurrioko Udalak jaietan berdintasunez, askatasunez eta errespetuz gozatzeko eta parte hartzeko eskatzen die pertsona guztiei, eta herritar guztiei dei berezia egiten die inplikazioa eskatzeko eta pertsonen aurkako indarkeria baztertzeko, aurre eginez, erasorik gabeko jaiak izan ditzagun.

Amurrioko Udalak herritarrak inplikatu nahi ditu azaroaren 25a, Emakumeen aurkako indarkeria ezabatzeko nazioarteko eguna, dela eta. Horretarako, horma-irudi bat sortuko da, eta horma-irudia egiteko amurrioarren parte-hartzea lortu nahi da.

Horma-irudia egin aurretik, partaidetza saioak egingo dira bi astez, Verónica Werckmeister horma-irudigile esperimentatuak gidatuta. Saio horietan horma-irudiaren azken zirriborroa egiteko eta udalerriko fatxada batean hura sortzeko aukera emango duten ideiak bilduko dira bi astez. Aurkezpeneko lehen saioa urriaren 5ean izango da, 18:00etan, Udaletxean, eta izen-ematea Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidean egin ahal izango da.

Amurriok oroitzapenezko horma-irudi bat du aste honetatik aurrera Dionisio Aldama kalean, urteko 365 egunetan sexu- eta genero-aniztasuna ikusgai egon dadin.

Artelana herriko Raisa Álava Robina artistak egin du, eta Amurrioko Udalak E28 LGTBIQA+ Harrotasunaren Nazioarteko Egunaren inguruan bultzatu duen sentsibilizazio-kanpainaren parte da. Horma-irudi koloretsuak tandem batean doazen hiru pertsona islatzen ditu, kolektiboa irudikatzen duen bandera goialdean dutela.

Ekimen horiek abian jartzearen helburua “LGTBIQA+ pertsonen eskubideak zaintzea eta, aldi berean, udalerriko sexu- eta genero-aniztasuna ikusaraztea da. Amurrioko Udalak berdintasunarekiko eta aniztasunarekiko konpromiso sendoa du, eta udalerri aske eta segurua izatera bideratzen ditugu gure ahaleginak”, azaldu du Txerra Molinuevo Amurrioko alkateak.

Amurrioko Udalak, atzo egindako osoko bilkuran, AINGURAK, udalerriak izango duen V. Berdintasun Plana, onartu zuen. Planak hiru urteko indarraldia izango du, 2025era arte. Planak herritarren aldez aurreko diagnostikoa jaso du, eta diagnostiko hori baliagarria izan da udalerriaren egoerari buruzko informazioa lortzeko eta dokumentu berria prestatzeko abiapuntua izateko.

AINGURAK onartzea aurrera pausoa da Amurrioko Udalaren berdintasun politiketan eta, lehen aldiz, Berdintasun Plan batek izena izango du. AINGURAKek hainbat ainguraketa, oinarri eta sustrai islatu nahi ditu, Plan berria eta berdintasun-politikak horien gainean finkatzeko.

Onartu berri den Planak “Gobernu Ona” izeneko lan-ardatz nagusi bat du. Ardatz hori hiru ardatz estrategikok osatzen dute, eta ardatz bakoitzak hainbat programa ditu, bakoitza bere ekintza eta helburuekin. AINGURAKen hiru ardatz estrategikoak hauek dira: “Emakumeak eta LGTBI kolektiboa ahalduntzea”, “Emakumeen eta LGTBIQA+ kolektiboaren aurkako indarkeriarik gabeko bizitzak” eta “Ekonomiak eta gizarte-antolamendua eraldatzea, eskubideak bermatzeko”

“Onartu dugun Plana berdintasunerako politika publikoak aurrera eramateko konpromiso sendoa da. Dokumentu berriak desberdintasunak gainditzeko politikak sustatzen jarraitzeko beharrari erantzuten dio. AINGURAKen bitartez, herritarrak inplikatu nahi ditugu, baita udal osoa ere, barnetik”, azaldu du Ixone Saratxaga Berdintasun zinegotziak.

Aurreko urteetan egin bezala, aurten ere aldarrikatu nahi dugu euskal gizarteak afektibotasunari, sexuari eta generoari dagokionez aniztasunean bizitzeko daukan eskubidea. 53 urte dira New Yorken Stonewall-eko istiluak gertatu zirela. 1969ko ekainaren 28 hartan, manifestazio espontaneo eta bortitzak egin zituzten, New Yorkeko Greenwich Village auzoko Stonewall Inn tabernan poliziak egindako sarekadaren kontra. Maiz adierazten da istilu horiek lehen aldia izan zirela Estatu Batuetako historian, non LGTBI komunitateak matxinada egin zuen komunitatea Gobernuaren onespenarekin jazartzen zituen sistemaren aurka. Horregatik, LGBTI kolektiboaren eskubideen aldeko mugimendu garaikidearen hazitzat hartzen dira mundu osoan.

Eusko Jaurlaritzaren Berdindu! Zerbitzuak- LGTBI kolektiboko kideei informazioa, aholkularitza eta laguntza eskaintzen dizkienak- aitortza egin nahi die kolektiboak gaur egun dituen eskubideak lortzeko bidean bizia galdu zutenei eta aktibismoari denbora eta izerdia eskaini zizkiotenei. Halaber, ezin da ahanzturan erori aktibistek egin zuten eta egiten diharduten gizarte-eraldaketako lana.

Horrez gain, belaunaldi berriengan ere jarri nahi dugu arreta, oraindik ere lortzeke dauzkagun eskubide askoren alde ari baitira lanean. Azkenik, aipamena egin nahi diegu gure lurraldearen mugetatik kanpo borrokan ari eta kolektiboari eragiten dioten Giza Eskubideen urraketen aurka altxatzen direnei. Berdindu! zerbitzuko kideon iritziz, erne egoten jarraitu behar dugu lurraldean gertatutako LGTBI kolektiboaren aurkako erasoen eta sexu- eta genero-aniztasunaren aurkako ideia politiko jakinen aurrean. Trans kolektiboaren eskubideak aldarrikatu behar ditugu, eta euren bizi-prozesua jarraitzen duten horiek babesteko legezko esparruak egituratu. Era berean, kolektiboari ikusgarritasuna eman behar diogu gizartean, eta elkarbizitza, errespetua, aniztasuna eta Giza Eskubideak sustatu behar ditugu.

Gonbita luzatzen diogu euskal gizarteari denoi eragiten digun prozesu honetan esku hartzeko, kolektiboarentzat horren garrantzitsua den egun hau ospatzeko eta ez ahazteko Berdindu! zerbitzuak egunero diharduela lanean. Izan ere, gizarte anitz honetako kide guztioi eragiten digu aferak, eta denoi dagokigu borrokan parte hartzea.

Azkenik, deia egin nahi dizuegu gaurko egunari ikusgarritasuna emateko eta gizartea sentsibilizatzeko antolatutako aldarrikapen ekitaldietan parte hartzeko, bai sare sozialen eta komunikabideen bidez, bai kaleetan. Txikia izanik ere, ekintza oro baita garrantzitsua aniztasunaren aldeko borrokan.