berriak

Amurrioko Udaleko Berdintasun Saila buru-belarri aritu da martxoaren 8aren inguruko programazioa antolatzen, eta adin guztietarako hainbat jarduera antolatu ditu: musika, bakarrizketak, antzerkiak, kirol-jarduerak eta haurrentzako jarduerak, besteak beste.

“Martxoaren 8a emakumeok berdintasunezko gizarte bat lortzeko egiten ditugun ahalegin handiak aldarrikatzeko eta ikusarazteko eguna da. Osasun-egoera hobetu ondoren, eta bakoitzaren erantzukizuna eskatuz, aurten gozatzeko eta gizarteratzeko aukera emango diguten jarduerak programatzeko aukera dugu, munduko emakumeen egoeran zentratuz eta horri buruz hausnartuz”, azaldu du Ixone Saratxaga Berdintasun zinegotziak.

Programatutako jarduerak:

Martxoak 4: Berdintasunaren aldeko standa. 11:00etan, azokan. GOFEren Oinez proiektua, Sartu Alavak emana. Bertan motxila moreak banatuko dira.

Martxoak 5: Emakumeak musikan. 19:30ean Amurrio Antzokian Amurrioko Musika Eskolaren eskutik. Sarrerak doan edukiera bete arte, gonbidapenak Kultur Etxean eta Musika Eskolan.

Martxoak 8

12:00-13:30 Amurrioko Emakumeen topaketa. Virginia Imazen bakarrizketa eta Amurrioko emakumeen prozesu partehartzailearen aurkezpena.

18:30 Marabillas Baserritarraren bakarrizketa

19:20 Irakurketa instituzionala

19:30 Elkarretaratzea mugimendu feministaren eskutik.

Martxoak 10: Haur jolasak, ipuin kontaketa eta tailerra. Arratsaldeko 17:00etan liburutegian 6 eta 8 urte bitarteko haurrentzat. Izen ematea martxoaren 2tik aurrera 945393720

Martxoak 12: PREPARADAS, LISTAS, YA! antzezlana Amurrio Antzokian 20:00etan.

Martxoak 13: III. BERDINTASUNAREN ALDEKO MARTXA. 10:00etan irteera Juan Urrutia plazatik.

Martxoak 22: Emakume musulmanak eta janzkera. 18:00etan Kultur Etxean. Hizlaria: Maya Amrae.

Martxoak 25: “Sofocos”. Antzezlana 19:00etan San Anton plazan.

2003tik aurrera, emakumeonganako indarkeriari buruzko datuak jasotzen hasi zirenetik, 112 emakume eta 11 haur erailak izan dira Euskal Herrian. Zenbaki onartezin honen atzean izenak eta izanak daude. Erauzitako bizi proiektuak. Bereziki memorian gorde nahi ditugu, 2021ean zehar erail dituzten Erika Tavares, Conchi Gonzalez, Aintzane Pujana, Maria Pilar Berrio Jimenez eta Miarritzeko 75 urteko bizilaguna.

Emakumeen aurkako indarkeria larderiarako tresna indartsua da, emakumeei zuzendua, indarrean dauden genero-arauak desafiatu eta eralda ez ditzaten. Mehatxurako tresna hori zuzenean emakumeengan erabiltzen da, baina baita haien gertuko pertsona maitatuenengan ere, min handiagoa sortzeko modu gisa. Kalkuluen arabera, bikotekideen edo bikotekide ohien eskutik indarkeria jasaten duten EAEko hamar emakumetik seik seme-alaba adingabeak dituzte, eta horiek ere biktima bihurtzen dira.

Indarkeria bikarioa esaten zaio emakumeari, hirugarren pertsonak baliatuz, kalte psikologiko handiena eta larriena eragiteko egiten zaion biolentzia motari, zeinak ankerkeria-maila gorena lortzen duen haien erailketarekin (seme-alabak, ama, aita, egungo bikotekidea, etab.). Istanbulgo Hitzarmenean ezarritakoa aplikatuz, kasu horiek ere genero-indarkeriaren parte gisa ulertzen dira, seme-alabei egindako kalteak erasotzaileek emakumeei tratu txarrak transmititzeko tresna bihurtzen diren heinean.

Azken lege-aldaketek dagoeneko jasotzen dute figura hori, biktima adingabeak babesteko neurriak sortzeari eta hedatzeari dagokionez. Hala ere, oraindik ere beharrezkoa da genero-indarkeria ukatzen duten, kasu horietan seme-alaben arriskua gutxiesten duten eta indarkeria horri aurre egiteko tresna juridikoak zalantzan jartzen dituzten diskurtsoen eta jarreren aurka ohartaraztea. Jarrera horiek adingabeen eta emakumeen birbiktimizazioan eragiten dute, haien salaketak susmopean jartzen dituzte, amak zigortzen dituzte, haien testigantza gutxiesten dute eta aitaren guraso-ahalaren eskubidea babesten dute, emakumeen eta adingabeen segurtasunaren eta indarberritzearen gainetik.

Emakumeen aurkako indarkeria beren seme-alaben bidez sistematikoki egikaritzeko modu horren aurrean, bai eta emakumeak kontrolatzeko, hertsatzeko eta kaltetzeko modu guztien aurrean ere, euskal erakundeok indarkeria horri aurre egiteko erantzukizuna dugu, kontuan hartuta ez direla gertakari isolatuak, egiturazko desberdintasun-egoera bati erantzuten diotela, eta egoera horri ikuspegi feministatik heldu behar zaiola.

Guzti honengatik, indarkeria matxista gertakarietan funtzionamendu protokoloek erabiltzen dituzten mekanismo guztiak egokiak izatea da giltza; beti ere, indarkeria mota hau pairatzen duten emakumeen ahalduntzea helburu duten ikuspuntu batetik. Horretarako, instituzio publikoez gain, gai honetan adituak diren pertsonen eta mugimendu feministen parte hartzea  beharrezkoa da ezarritako protokoloekin lagundu dezaten, eta azken batean, berdintasunezko etorkizun baterantz abiatu gaitezen.

Horregatik, Amurrioko Udalak honako konpromiso hauek hartu nahi ditu:

Amurrioko Udal honek ez du murrizketarik egingo 2022eko berdintasun-aurrekontuetan, eta gainera, berdintasun-unitateak egonkortzeko eta indartzeko konpromisoa hartzen du.

• Indarkeria bikarioaren errealitate hori agerian jartzen eta behar bezala artatzen laguntzea, besteak beste, Istanbulgo Hitzarmenak jasotzen dituen indarkeria-bideen biktima adingabeak koordinazio protokoloetan eta indarkeria matxistaren biktimak artatzeko protokoloetan txertatzea eta protokolook eguneratzea, Protokoloan agertzen den bezala.
• Indarkeria matxistaren biktima diren adingabeak hautematen eta esku-hartze goiztiarra egiten laguntzea, zerbitzuen bidez, beste eragile batzuekin lankidetzan (hezkuntza-, osasun- eta polizia-agenteak, etab.), eta emakumeek beren ardurapean dituzten adingabeekin eta kaltetutako beste pertsona batzuekin behar dituzten beharrei eta baldintzei erantzutea. Horretarako, Protokoloaren jarraipen mahaietan, adingabeei buruzko gaia landuko da.
• Indarkeria matxistaren biktima diren adingabeak babesteko eta esku hartzeko prozesuak hobetzea, beren eskumenen esparruan, ikuspegi feminista duen sektore arteko abordatze integral eta holistikotik.
• Neurri guztien erdigunean jartzea biktimen eskubideak eta haien ahalduntzea, eta laguntza integrala ematen laguntzea, prozedura judizialarekin duten inplikazio- edo lankidetza-maila edozein dela ere.
• Udaleko langileek berdintasunari buruzko prestakuntza jaso dezaten bultzatzea, bereziki emakumeen aurkako indarkeria matxistaren aurrean erantzuten diharduten langileei, genero-ikuspegia eta giza eskubideen ikuspegia aintzat hartuz .
• Amurrioko Udal honek eremu ezberdinei (hedabideei, enpresei, hezkuntza-zentroei...) zuzendutako indarkeria matxisten prebentzio eta salaketa kanpainak abiatuko ditu, eragina-ebaluazioa jasoz.
• Lanean jarraitzea berdintasunaren aldeko eta emakumeenganako indarkeriaren aurkako, eta, ondorioz, haien seme-alaben aurkako, herri-itun bat lortzeko, herritar guztien jarrera aktiboa behar dugulako indarkeria matxistarik gabeko gizarte bat lortzeko.
• Amurrioko Udal honek, lurraldeko mutil eta gizonei zuzendutako lanketa berezituak abiatzeko konpromisoa hartzen du, afektibitatea, harreman ereduak, maskulinitate ereduak, rol sexistak gainditzeko estrategiak, eta parekidetasuna lantzeko besteren artean; eta horretarako programa zehatzak aktibatzeko konpromisoa ere hartzen du.
• Amurrioko Udaletik, borroka feministaren alde hartu dugun konpromisoa berretsi nahi dugu, indarkeriarik gabeko gizarte demokratiko bat eraikitzeko bide eta tresna nagusia den heinean.

Era berean, herritarrei dei egiten diegu azaroaren 25ean bat egin dezaten emakumeenganako indarkeriaren aurkako nazioarteko eguna dela-eta Amurrion deitutako mobilizazioarekin

Aurten Aiarako koadrila ez da berriro Berdintasunaren aldeko Eskualdeko III. Ibilaldi Neurtu klasikorik gabe geratuko. Kaskagorri eta Altzarrate klubek Amurrio, Aiara eta Laudioko Udalekin elkarlanean antolatutako kirol hitzordua martxoaren 13an, igandean, izango da.

Ohitura denez, kirolariak 10:00etan irtengo dira aldi berean Amurrioko eta Laudioko Herriko Plazatik, helburu honekin: eskualdean berdintasuna indartzea eta sustatzea. Ibilaldiak laugarren edizioa beteko du 2022an, eta Arabako bi herriak lotuko ditu, familian egiteko inolako zailtasunik gabeko 12.400 metroko ibilbide lauaren bitartez. Gainera, ibilbidearen erdian, Luiandon hain zuzen ere, edariak, fruta eta gailetak izango dituen hornidura puntua egongo da parte-hartzaileentzat.

Egungo osasun-egoera dela eta, hornidura gelditu gabe egingo da, pilaketak saihesteko. Ibilbidea amaitutakoan, doako autobusak jarriko dira abiapuntura itzultzeko.

Izen-ematea

Parte hartu nahi dutenek otsailaren 22tik martxoaren 10era bitartean eman ahal izango dute izena, edo kamisetak agortu arte, bi klubetan eta Aiarako Udaleko HAZen. Laudion, herritarrek udaletxeko sarrerara jo beharko dute astearte eta ostegunetan, 11:00etatik 13:00etara. Amurriok, bestalde, Kultur Etxea jarriko du herritarren eskura, martxoaren 4an eta 11n (ostiralak), 11:00etatik 13:00etara eta martxoaren 7tik 10era, 17:00etatik 19:00etara.

Izena emateak 5 euroko kostua izango du, 2020an, pandemiaren ondorioz martxa bertan behera geratu zen urtean, kopuru hori ordaindu zuten pertsonentzat izan ezik. Ordainagiriarekin batera, kamiseta tekniko bat eta oroitzapenezko zapi bat emango zaizkie parte-hartzaileei, dortsalarekin eta martxaren irteera eta iritsiera kontrolatzeko fitxarekin batera.

Berdintasunaren aldeko ekimen honetako parte-hartzeak gora egin du ospatutako edizio bakoitzean. 2019an, Berdintasunaren aldeko Eskualde Martxa Neurtuak 1.318 pertsona bildu zituen, lehen urteko parte-hartzaile kopurua bikoiztuz.

Sariak Arespalditzako Emakumeen Gelan banatuko dira ekitaldiaren ondorengo egunetan, denbora guztiak egiaztatu eta tarteko denborak atera ondoren.

Amurrioko Udaleko Berdintasun Sailak bi asteko egitaraua antolatu du azaroaren 25aren, Emakumeenganako Indarkeriaren Kontrako Nazioarteko Egunaren, inguruan. Datorren asteazkenean, azaroaren 17an, hasiko den programazioak bi antzezlan, hitzaldi bat, Kai Nakairen kontzertu bat eta Juan Urrutia plazan egingo den ohiko kontzentrazioa bilduko ditu. Aurten, kontzentrazioaren aurretik, Zankueta abesbatzak emanaldia eskainiko du.

Azaroak 17: “La voz de las mujeres supervivientes”, arratsaldeko 18:00etan, Amurrio Antzokian, Mugarik Gabe taldearen eskutik.

Azaroak 20: Kai Nakairen kontzertua, 20:00etan, Amurrio Antzokian.

Azaroak 23: “Indarkeria matxistari nola aurre egin aisialdian eta hezkuntzan” hitzaldia, 18:00etan, Kultur Etxean, Aiaraldea komunikabidearen eskutik. Interpretazio zerbitzua eskainiko da.

Azaroak 25

Txapa banaketa 18:00etan Juan Urrutia plazan.

Udaletxea more kolorez argiztatuko da. Zankuenta abesbatzaren emanaldia 19:00etan eta kontzentrazioa 19:15ean Juan Urrutia plazan.

“A golpe de palabra” antzerki laburra arratsaldeko 18:00etan edo 20:00etan Amurrio Antzokian. Sarrerak doan izango dira, eta helbide honetan erreserbatu daitezke: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.

Amurrioko La Casonak ‘Afrikak Inspiratzen du – Emakume Defendatzailak’ erakusketa hartuko du abenduaren 1etik 15era, historia aldatu duten eta hainbat eremutatik inspiratu gaituzten emakume afrikar handiak jendeari hurbiltzeko. Aste honetan zehar Afrikako literaturetako emakumeen arteko elkarrizketak izango dira.

Erakusketak Afrikako 9 emakume hurbilduko dizkigu. Emakume horiek erreferenteak dira euren lan-eremuetan, politikan, artean, ingurumenean edo parte-hartze komunitarioan, besteak beste, eta emakumeen eta, oro har, Afrikako gizartearen eskubideak sustatu dituzte. Emakume horietako batzuk nazioartean nabarmendutako pertsonak dira, hala nola Wangari Maathai, Bakearen Nobel saria, eta beste batzuek, hain ezagunak ez diren arren, Dalanda Diallo kasu, komunitateetan aldaketa handiak eragin dituzte, lurra eskuratzeko aukera, adibidez.

Erakusketa Susanna Martinen irudiak dituzten 11 paneletan antolatzen da, eta ikusleek haiekin elkarreragin dezakete, emakumeen bizitza-istorioak sakonago ezagutu ditzakete, baita euren emakume erreferenteak proposatu ere. Urte honen amaieran, erakusketan parte hartzen duten Afrikako emakume defendatzaileak eta baita jendeak proposatutako erreferentziazko emakumeak bilduko dituen eta lankidetzan oinarrituta egongo den liburu bat egingo da.

Erakusketaren jatorria

Afrikak Inspiratzen du kanpaina 2019an sortu zen, Afrikako Baliabideen Zentroko boluntarioen ekimenez, euskal gizarteak Saharaz hegoaldeko Afrikari eta, zehazki, bertako emakumeei buruz, zuen irudia eraldatzeko. Horretarako, emakume afrikarraren irudi emantzipatzailea sustatzen da, erreferenteak sortuz eta estereotipoak deseraikiz. Orduz geroztik, artikuluak argitaratzeko eta zabaltzeko online kanpaina bultzatzen da, hainbat arlotan, ingurumenean, politikan, kulturan… erreferenteak diren Afrikako emakumeak euskal herritarrengana hurbiltzeko.

Emakumeen arteko elkarrizketa

Aste honetan zehar Afrikako literaturetako emakumeen arteko elkarrizketak izango dira. ‘Ibilbideak Literaturaren bidez’, egileekin hitz egiteko gunea da, eta, horren bitartez, euren herrialdeak, interesak, kezkak eta euren lanetan jorratzen dituzten gaiak ezagutaraziko dira. Gainera, horietako bakoitzak emakumearen egoerari buruzko azterketa bat gehituko du, bizitzako eta geografiako hainbat planotatik, eta gonbidatutako idazle bakoitzaren obren zatiak irakurriko dira. Bihar Angela Nzambi Bacaleren txanda izango da eta abenduaren 2an Fumilayo Johnson Sopalerena katekesiko aretoan eta, abenduaren 5ean, Souad Hadj-Aliren txanda Kultur Etxean.

Amurrioko Udalak “Ingurune digitaletan indarkeria matxistak prebenitzeko gidaliburua” bidali du udalerriko bizilagun guztien etxeetara. Gidaliburu horren helburua amurrioarrei indarkeria-mota horri aurre egiteko, eta, modu prebentiboan, horren zergatiak eta ondorioak ezagutzeko eta sakontzeko baliabide batzuk ematea da.

“Amurrioko Udalak berdintasunarekin konpromiso sendoa erakusten jarraitzen du, indarkeria matxistaren aurkako borroka sustatuz. Teknologia berriek ildo horretan lan egin behar izateko agertoki berria jarri digute mahai gainean; horregatik, udalerriko bizilagunen artean postontzietan banatzen ari den gidaliburuak, herritarrak informatzea, prestatzea eta sentsibilizatzea du helburu, ingurune digitalean horrelako egoerei aurrea hartzeko” azaldu du Ixone Saratxaga Berdintasun zinegotziak.

Interneterako eta sare sozialetarako sarbideak eta erabilerak urteak daramatza etengabe gora egiten. Covid-19ak sortutako egungo testuinguruaren ondorioz, mundu digitala oso azkar ari da nagusitzen, eta, ondorioz, aipatutako ingurune digitalean gero eta indarkeria- eta jazarpen-egoera gehiago daude LGTBI kolektiboko pertsonen eta emakumeen aurka.

Amurrioko Udalak eta Genero Indarkeriaren aurkako Estatu Itunaren funtsek batera finantzatu duten gidaliburu horren bitartez, indarkeria matxista mota horri aurre egiteko behar duten informazioa emango zaie herritarrei. “Informazioa eta baliabideak izatea funtsezkoa da kasu horietan nola jokatu jakiteko, indarkeria matxistaren biktima izan daitezkeenei eta, oro har, herritar guztiei, informazioa eskainiz, eta, gainera, askotan oharkabean pasatzen den indarkeria mota horri buruzko kontzientzia soziala sortzen lagunduz”, adierazi du Saratxagak.

Attachments:

File	Description	File size	Created
Gida.pdf		1512 kB	09-09-21 10:51