Igande honetan Amurriok berdez jantziko ditu berriro bere kaleak, pandemia dela eta bi urtez egin gabe egon eta gero. Minbiziaren Aurkako III. Martxa “Amurrio Martxan” lelopean egingo da, herritarrak gaixotasun horren inguruan sentsibilizatzeko. Ekitaldi honetan Aurreraka Emakume Elkarteak, Minbiziaren Aurka Araban Elkarteak eta Amurrioko Udalak bat egiten dute.
Irteera 10:30ean izango da Juan Urrutia plazatik, eta helmuga ere bertan izango da. Ibilbideak zazpi kilometro izango ditu, adin guztietarako egokiak, plazatik irten eta Olakotik, Nerbioiko Parke Linealaren hasieratik, Abiagatik eta El Reforretik igaroz. Jarduera ludikoa eta kirol-arlokoa da, ez lehiakorra, eta AECCrekin lankidetzan aritu nahi dutenentzat irekita dago. Bildutako guztia ikerketara bideratuko da.
Izena aurrez aurre emateko azken aukera ostiral honetan izango da, San Anton azokaren ondoan egongo den standean. Izen-emateak online ere egin daitezke ostiralera arte, izena, abizenak eta NAN zenbakia helbide honetara bidaliz: Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.. Izen ematearen prezioa 10 eurokoa da.
Txerra Molinuevo Amurrioko alkateak hitzordu berezi honetan parte hartzera gonbidatu ditu amurrioarrak. “COVID-19ak eragindako pandemia dela eta, bi urtez ez dugu martxa hau egin, eta inoiz baino gehiago animatu nahi ditugu herritarrak parte hartzera eta marea berde handia sortzera, ikerketari laguntzeko”, adierazi du Molinuevok.
Minbiziaren Aurka Araban Elkartearen aldetik, Miren Bilbao presidente berriak azpimarratu nahi izan du beharrezkoa dela ikerketa bultzatzea, minbizi mota guztietan ekitate handiagoa egon dadin. “Funtsezkoa da biziraupen baxueneko minbizien ikerketari laguntza handiagoa ematea, pankreakoari, biriketakoari, hestegorrikoari eta gibelekoari, hain zuzen ere, bai eta kasu gutxi daudelako eta, beraz, datu gutxiago ditugulako ikertzeko zailagoak eta ohikoak ez diren beste tumore batzuei ere”, azpimarratu du. Helburua, 2030ean % 57ko biziraupenetik % 70era igarotzea da. Amurrioko martxaren harira, Miren Bilbaok bizi-ohitura osasungarrien garrantzia ere azpimarratu du, minbizien % 44a bizi-ohitura osasungarriekin ekidin daitekeela gogorarazita. Eta amurrioar guztiak Martxan parte hartzera animatu ditu, bildutako guztia ikerketara bideratuko dela adieraziz.
Arreta psikologiko eta sozialeko zerbitzua Amurrion
Minbiziaren Aurka Araban Elkarteak (AECC Araba) eta Amurrioko Udalak urtebete baino gehiago daramate lankidetzan elkarteak minbizia duten pertsonei eta haien senideei arreta emateko eskaintzen dituen doako laguntza psikologiko eta sozialeko zerbitzuak udalerrira hurbiltzeko.
Zerbitzuak iazko apirilaren 12an hasi ziren ematen Kultur Etxean. Aurten, bai psikologoak bai gizarte-langileak astelehenero ematen dute arreta Amurrion, 10:00etatik 15:00etara. Hitzordua eskatu nahi dutenek 945263297 telefono-zenbakira deitu edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatzi dezakete.
