Amurrioko Udalak pasabide bat du udal zergak ordaintzeko

  • Plataformak aldizkako zergak, tasak eta trafikoko isunak ordaintzeko aukera emango du; Gainera, hemendik aurrera, edozein banku-erakunderen txartelarekin egin ahal izango da ordainketa, TPV aukera markatuta.
  • Zerbitzu horretara sartzeko, ordainketarako pasabide bat dago Udalaren webgunean (www.amurrio.eus), “Nire ordainketa” erlaitzean.

Amurrioko Udalak beste pauso bat eman du administrazio elektronikoaren sisteman sartzeko. Horretarako, aldizkako udal-zerga guztien ordainketa erraztu du, ordainketarako pasabide baten bidez. Pasabide horrek ordainketa erraztuko du, eta gestioa erosoagoa bilakatuko du herritarrentzat.


Gainera, hemendik aurrera, edozein banketxetako txartelarekin egin ahal izango da ordainketa, TPV aukera markatuta. Lehen Kutxabankekin eta Laboral Kutxarekin baino ezin zen egin. Udalak hartuko ditu bere gain kudeaketa horren ondoriozko gastuak.
“Ordainketarako pasabidea, zenbait tasa eta zerga ordaintzeko lehendik ere bazegoen tresna da, baina orain, zergadunei kudeaketa errazteko helburuarekin, zerga-erroldaren bitartez izapidetzen diren tasa guztiak sartu dira. Modu azkarra eta segurua da, eta kreditu txartel baten bidez egin daiteke etxetik”, azaldu du Txerra Molinuevo Amurrioko alkateak.


Hemendik aurrera, ordainketarako pasabideak zergak, tasak eta trafikoko isunak ordaintzea ahalbidetuko du. Zehazki, Ondasun Higiezinen gaineko Zerga (OHZ-IBI), Jarduera Ekonomikoen gaineko Zerga (JEZ-IAE) eta Trakzio Mekanikoko Ibilgailuen gaineko Zerga (TMIZ-IVTM); hilerrien, larreen, zaborraren, luberritzearen, idazkunen, San Antongo merkatuaren, ibien eta mahaiekin eta aulkiekin okupatzearen gaineko tasak; eta trafikoko isunak.


Zerbitzu horretara sartzeko, ordainketarako pasabide bat dago Udalaren webgunean (www.amurrio.eus), “Nire ordainketa” fitxan. Zergak ordaintzeko, ordainagirian agertzen den CPR izenekoa aukeratu beharko da, eta eskatutako datuak eman beharko dira. Bete ondoren, finantza-erakundea aukeratu eta txartelaren datuak sartu beharko dira.

Amurriok 2021erako ingurumen programa onartu du

Dokumentuak ingurumena hobetzeko 21 ekintza jasotzen ditu, urtean zehar garatzeko.

Udalerriak udal Ingurumen Politika berria ere badu, martxoaren 25eko osoko bilkuran onartua.


Amurrioko Udalak, Ingurumena Kudeatzeko Europar Batasuneko EMAS Sistema du ezarrita, eta ingurumen arloko alderdi esanguratsuei eta hautemandako arrisku eta aukerei aurre egiteko beharrezko ekintzak ezartzen dituen 2021erako Ingurumen Programa bat onartu du.


Udalerriaren testuingurua aztertu ondoren, onartutako Ingurumen Programak 21 ekintza jasotzen ditu, guztiak ere Garapen Jasangarriko Helburuekin bat datozenak. Ingurumen arloko alderdi esanguratsuetatik datozen 9 helburuak nabarmentzen dira, eta horiek 10 ekintzatan islatuko dira. Bestalde, programa, antzemandako arrisku eta aukeretatik ateratako beste 11 ekintzarekin osatzen da.


Amurrioko Udalak, 2021eko Ingurumen Programaren barruan, antzemandako 9 helburu hauek betetzean datzaten ingurumen arloko alderdi esanguratsuei heltzea proposatu du:


  • Udal horniduraren bajako sareko galerak murriztea.
  • Saneamenduko udal-sare bereizleak egiteko bidean aurrera egitea.
  • Etxebizitza-sektorean energia berriztagarrien sorkuntza handitzea.
  • 2020. urtearekin alderatuta legeztatutako jarduera kopurua handitzea.
  • Ekitaldiak eta bilerak antolatzeko orduan ingurumen arloko irizpideak sartzea.
  • Udaletxeko paper kontsumoa murriztea.
  • Udaletxeko energia kontsumoa murriztea.
  • Udalerria klima-aldaketa dela eta aurreikusitako aldaketetarako prestatzea, klima-aldaketara egokitzeko estrategiaren bitartez.
  • Bisita gidatu kopurua handitzea; horretarako, Goikomendi-Kuxkumendi parkeko ikaztegiaren estalkia konponduko da.

Era berean, hautemandako aukerei eta arriskuei aurre egiteko beste ekintza batzuk planifikatu ditu Udalak. Ekintza horien artean daude, besteak beste, Armuru errekaren proiektu integrala gauzatzea, argiteria publikoa berritzeko proiektu integrala amaitzeko plangintza egitea, udalerriko hainbat sektoreri energia-eraginkortasunari buruzko aholkularitza ematea, ekonomia zirkularra bultzatzea, Mendi Publikoaren Antolamendu Plan berriaren garapenean klima-aldaketara egokitzea, 109 hektarea basoberritzeko proiektua idaztea eta 7,9 hektarea basoberritzeko proiektua gauzatzea, Akuiferoen urrakortasun eremuan gaitasun hidriko handiko espezieak landatzea eta espezie inbaditzaileen inbentarioa egitea, horien jarraipena egiteko.


Udalaren Ingurumen Politika onartzea


Martxoaren 25ean egin zen Amurrioko Udalaren osoko bilkuran, Udalbatzak aho batez onartu zuen udaleko Ingurumen Politika, 2000. urteko akordioa berrituz. Datozen urteetarako onartutako dokumentuak ingurumena eta udal baliabideak eraginkortasunez zaintzeko eta kudeatzeko konpromisoa hartzen du, herritarren bizi-baldintzen eta -kalitatearen hobekuntza kontuan hartuta.

Amurriok Udal Berdintasun Plan berria egiteko herritarren partaidetzarako saio bat deitu du

  • Informazioa biltzeko saioa datorren apirilaren 21ean egingo da; horretarako, apirilaren 19a baino lehen eman behar da izena, Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera mezu elektronikoa bidalita edo 945 89 11 61 telefono-zenbakira deituta
  • Amurrioko emakume guztiei irekitako deialdi honetatik ateratako ondorioak, hautemandako beharrei erantzungo dien plana egiteko abiapuntuetako bat izango dira

Amurrioko Udala bere V. Berdintasun Plana egiteko lehen pausoak ematen hasi da. Horretarako, gauzatu aurretik, deialdi ireki bat egingo du Udalak, Amurrioko emakumeen bizitzan eragiten duten alderdiei buruzko eskaera sozial, iritzi, baldintza, behar eta pertzepzio nagusiak zeintzuk diren jakiteko. Informazioa biltzeko saioa apirilaren 21ean izango da, 18:00etan, eta parte hartu nahi dutenek apirilaren 19a baino lehen eman beharko dute izena.


Gaur egun, berdintasun-diagnostikoa egiteko puntuan gaude, eta, horretarako, udalerriko emakumeen iritzia jaso nahi dugu. Programatutako saioaren bidez, Amurrioko egungo egoerari buruzko informazioa lortu nahi da, eta Udalak azken urteetan bultzatu dituen berdintasun-politiken eragina eta emaitzak ezagutu. Deialdi honetatik ateratako ondorioak, antzemandako premiei erantzungo dien V. Berdintasun Plana egiteko abiapuntuetako bat izango dira, eta plana behin betiko onartu aurretik, herritarrekin kontrastatuko da.


“Aurretik diagnostiko on bat egitea funtsezkoa da Amurrioko V. Berdintasun Plana berme osoz gauzatzeko. Plan horrek udalerriko emakumeen eta gizonen arteko desberdintasunak gainditzeko politika publikoak bultzatzen jarraitzeko beharrari erantzungo dio”, azaldu du Ixone Saratxaga Berdintasun zinegotziak.


Lan-saioa apirilaren 21ean izango da, 18:00etan, eta informazioa biltzeko prozesu horretan parte hartu nahi duten emakume guztientzat zabalik dago. Jasaten ari garen osasun egoera dela eta, parte hartzeko beharrezkoa izango da izena ematea apirilaren 19a baino lehen, Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera mezu elektronikoa bidaliz edo 945 89 11 61 telefono zenbakira deituz eta Berdintasun teknikariaz galdetuz. Bilkura non egingo den inskripzio kopuruaren arabera erabakiko da, eta, beraz, inskripzioa egin ondoren, bertaratutakoei jakinaraziko zaie. Gainera, saio horren ondoren, bide telematikoak gaituko dira lanaldira joan ezin izan diren emakumeek euren ekarpenak egin ditzaten.

Amurriok bertan behera utzi du 2021eko San Prudentzio ospakizuna

  • Ez da San Prudentzio eguna ospatuko, ohi bezala, karakol-janarekin eta danborradarekin, baina apirilaren 27an eta 28an musika izango da kaleko megafoniatik.

Covid-19ak sortu duen egoera dela eta, Amurrioko Udalak San Prudentzio eguna ohi bezala, karakol-janarekin eta danborradarekin, ez ospatzea erabaki du. Jarduera horiek ez egitea egungo osasun-egoeraren eta erakundeek hartutako neurrien ondorio da. Amurrioko Udalak, pandemia hasi zenetik egin duen bezala, dei berezia egiten die herritarrei pilaketak saihesteko.


Egoera gorabehera, jai eguna da arabarrentzat eta, beraz, San Prudentzio bezperan, apirilaren 27an, danborradaren soinua entzungo da kaleko megafoniatik eta, hurrengo egunean, 12:00etatik 14:00etara musika jarriko da, denok alaitzeko.


“Amurrioko bizilagunak danborra jotzera balkoietara irten ginen urtearen ostean, normaltasun apur bat berreskuratzen ari gara, eta horrek duela urtebete hain urrun ikusten genituen gauzak egitea ahalbidetzen digu. Hala ere, erantzukizun kolektiboa dela eta, aurten ez dugu San Prudentzio eguna orain arte egin dugun bezala ospatuko, jende pilaketak ahalik eta gehien ekidin behar ditugu, gure udalerrian izaten ari den kasuen eragin txikiari eusteko”, azaldu du Txerra Molinuevo Amurrioko alkateak.

Amurrioko Kultur Etxeak arropen kontsumo arduratsua sustatzeko tailerra jasoko du

  • “Zer ezkutatzen da zure arroparen etiketen atzean?” izenburupean, kontsumo kontzienteagoa eta arduratsuagoa egiteko tresnak eskainiko dira.
  • Bertaratzea doakoa da, baina aldez aurretik izena eman behar da Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidean.


Apirilaren 20an, “Zer ezkutatzen da zure arroparen etiketen atzean?” tailerra egingo da Amurrion. SETEM Hego Haizeak eta Amurrioko Udaleko Berdintasun Sailak antolatutako saioak arropa kontzienteago eta arduratsuago kontsumitzeko tresnak eskainiko zaizkie parte-hartzaileei.


Tailerra, Espainiako Estatuan Arropa Garbia Kanpaina koordinatzen duen SETEM GGKEko prestatzaileek emango dute, eta egun esanguratsuan izango da, apirilaren 24tik, Bangladesheko Rana Plaza erori zenetik 8 urte beteko diren egunetik, gertu, hain zuzen ere. Hori dela eta, antolatzaileek, saioan parte hartzera eta dugun janzteko moduari buelta ematera animatzen dituzte herritarrak.


Arropa kontzienteago eta arduratsuago kontsumitzeko tresnekin batera, “Fast Fashion” delakoak gizartean, ingurumenean eta osasunean dituen eraginak erakutsiko ditu tailerrak, eta baita industria horren kutsadura eta ustiapena, eta batez ere emakumeen eta haurren esplotazioa, murrizteko giltzarriak ere.


Doako aldez aurretiko izena ematea


Tailerra Amurrioko Kultur Etxean izango da, asteartean, apirilaren 20an, 18:00etan. Doako jardunaldia da, baina aldez aurretik izena eman beharko da Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatziz.

Minbiziaren Aurkako Arabako Elkarteak Amurrioko Kultur Etxera hurbilduko ditu bere doako zerbitzuak

  • Apirilaren 12tik aurrera, minbizia duten pertsonentzako eta haien senideentzako arreta psikologiko eta sozial zerbitzua jarriko da martxan.
  • Hitzorduak astelehen goizetan izango dira, baina aldez aurretik ordua zehaztu beharko da 945263297 telefono-zenbakira deituz edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatziz.

Amurrion, 2021eko apirilaren 6an. Minbiziaren Aurkako Arabako Elkarteak (AECC Araba), Amurrioko Udalaren laguntzarekin, minbizia duten pertsonei eta haien senideei arreta emateko dituen laguntza psikologikoko eta sozialeko doako zerbitzuak hurbilduko ditu udalerrira. Zerbitzuak apirilaren 12tik aurrera hasiko dira Kultur Etxean.


Pauso berri horri esker, Minbiziaren Aurkako Arabako Elkarteak orain arte, duela 30 urtetik, Gasteizen eman dituen zerbitzuak Amurrion ere emango ditu. “Arabako Elkarteak duen lehentasuna, ahal den neurrian, ditugun doako zerbitzu guztiak bideratzea da, eta arreta ona ematea minbizia pairatzen ari diren pertsonei eta haien senideei”, azaldu dute elkartetik.


Arreta psikologikoa eta soziala Amurrioko Kultur Etxeko lokal batean emango da apirilaren 12tik aurrera. Hortik aurrera, bai psikologoak bai gizarte-langileak astelehenero emango dute arreta Amurrion, 10:00etatik 15:00etara. Gerturatu aurretik, hitzordua hartu beharko da, 945263297 telefono-zenbakirara deituta edo Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera idatzita.

Cookien politika

Webgune honek bere cookieak eta hirugarrenenak erabiltzen ditu esperientzia eta zerbitzu hobea eskaintzeko. Nabigatzean edo gure zerbitzuak erabiltzean, onartu cookien erabilera. Hala ere, cookieak sortzea eta ezabatzea eragozteko aukera duzu, zure nabigatzailean dagokion aukera aukeratuta. Zure nabigatzailean cookie-en erabilera blokeatuz gero, litekeena da webguneko zerbitzu edo funtzionalitate batzuk eskuragarri ez egotea.