berriak

• Izena emateko epea ekainaren 8tik 12ra irekiko da, 10:00etatik 13:00etara

Aire zabaleko udako igerilekuen denboraldia ekainaren 15ean hasiko da Amurrion eta irailaren 15era arte luzatuko da. Ordutegia: astelehenetik igandera, 10:30etik 20:30era, ekainean eta irailean; eta 10:30etik 21:00etara, uztailean eta abuztuan.

Bañueta Kiroldegian abonatutako pertsonak doan sartu ahal izango dira, gutxienez aurtengo urtarrilaren 1etik abonatuta badaude eta data horretatik aurrera baja eman ez badute.

Udal igerilekuetako harrera irekita egongo da ekainaren 8tik 12ra, 10:00etatik 13:00etara. Epe horretan abonatuen alta edo baja guztiak egin ahal izango dira.

• 2022 eta 2023 artean jaiotako neska-mutilei zuzendutako ekimena da, eta uztailean zehar euskarazko jarduera ludikoak eta hezigarriak eskainiko ditu Armurulanda Udal Ludotekan.

Amurrioko Udalak udalekuen edizio berri bat jarri du martxan, 2022 eta 2023 bitartean (biak barne) jaiotako haurrei zuzendutako euskarazko aisialdi hezitzaileko proposamena.

Programaren helburua da Amurrioko haurrei aukera ludiko eta hezitzaile bat eskaintzea eskola-oporraldian, askotariko programazio baten bidez: jolasak, sormen-tailerrak eta beren adinera egokitutako beste jarduera batzuk, sozializazioa, sormena eta euskararen erabilera sustatuz, ondo pasatzeko eta ikasteko ingurune batean.

Udalekuak uztailean egingo dira, Armurulanda Udal Ludotekaren instalazioetan, eta bi txandatan antolatuko dira:

• Lehen txanda: ekainaren 29tik uztailaren 10era.
• Bigarren txanda: uztailaren 13tik 24ra.

Jardueren ordutegia 09:30etik 13:30era izango da.

Plazak mugatuak dira eta Amurrion erroldatutako pertsonek lehentasuna izango dute esleipenean. Erroldatuta ez dauden haurren eskaerek hutsik geratzen diren plazak eskuratu ahal izango dituzte. Izen-emate kopuruak plaza erabilgarriak gainditzen baditu, zozketa bat egingo da onarpenak zehazteko.

Parte hartzeko prezioa 62 eurokoa izango da txanda bakoitzeko.

Izen emateak ekainaren 1etik 12ra

Interesa duten familiek ekainaren 1etik 12ra bitartean egin ahal izango dute izen-ematea, Udal Ludotekan bertan, dagokion formularioa aurkeztuta.

Eskaerarekin batera ordainketaren frogagiria aurkeztu beharko da, Udaletxeko kutxazainean edo banku-transferentzia bidez egin ahal izango dena, parte hartzen duen haurraren izen-abizenak adieraziz.

Izena emateko ordutegia 17:00etatik 19:30era izango da.

Amurrioko Udalak familiak animatu nahi ditu aisia, ikaskuntza eta bizikidetza uztartzen dituen ekimen honetan parte hartzera, txikienei euskarazko uda aktibo eta aberasgarria eskainiz.

• Lankidetza horri esker, Udalak zerbitzu publikoak kudeatzeko eredu eraginkor baten aldeko apustua egiten jarrai dezake, gizartean eragin handia izango duena

Indesa enplegu-zentro bereziak bere jarduera handituko du Amurrioko udalerrian, udal eraikinen garbiketa zerbitzuen eta berdeguneen mantentze lanen kudeaketa bere gain hartu ondoren. Gizarte Politiketako foru diputatu Gorka Urtaranek, Amurrioko alkate Txerra Molinuevok eta Indesako gerente Ander Eguidazuk izandako bileraren ondoren egin dute bat ekimenarekin. Bilera horretan, udalerrian zerbitzu horiek martxan jartzeko lankidetza-hitzarmena finkatu da.

Erakundeen arteko topaketak berretsi egin du inplikatutako administrazioen arteko konpromiso partekatua, zerbitzuen prestazio eraginkorra eta eragin sozial argia uztartzen dituen kudeaketa publikoko eredu batekin, batez ere desgaitasuna duten pertsonen laneratzearen arloan.

Indesa irabazi-asmorik gabeko sozietatea da, eta Arabako Foru Aldundiak eta lurraldeko beste erakunde batzuek (Arabako Batzar Nagusiak, Eusko Jaurlaritza eta hainbat udal, Amurrioko Udala barne) osatzen dute. Mila langile baino gehiago ditu, horietatik % 90 inguru desgaitasunen bat dutenak, eta Arabako enplegu-zentro berezi nagusi eta enplegu inklusiboaren sorkuntzan erreferente gisa finkatu da.

Gizarte Politiketako foru diputatuak bileran nabarmendu duenez, Indesak Amurrion duen jarduera zabaltzea “oso albiste ona da, aukera ematen baitu desgaitasuna duten pertsonentzako enplegu egonkor eta kalitatezkoaren aukerak sortzen jarraitzeko, haien gizarteratzea eta garapen pertsonal eta profesionala bultzatuz”.

Era berean, erakundeak landa eremuan duen presentzia indartzearen garrantzia azpimarratu du, eta zuzeneko itzulkin soziala duten zerbitzu publikoen prestazioa hobetzea ahalbidetuko duten erakundeen arteko lankidetza formuletan aurrera egiten jarraitzearen garrantzia.

Amurrioren kasuan, udal eraikinen garbiketa-zerbitzua apirilaren erdialdetik dago martxan, eta, besteak beste, instalazio hauek ditu: Mendiko Eskola (Haur Hezkuntza eta Lehen Hezkuntza), HHE eta prestakuntza-gelak, San Jose gizarte-etxea, Kultur Etxea, Musika Eskola eta Tantaka haurreskola. Gainera, indarrean dauden kontratuak amaitu ahala, ekipamendu berrietara zabaltzea aurreikusten da.

Bestalde, lorezaintza-zerbitzua indartzeak bere baitan hartuko ditu hiri-inguruko berdeguneak, auzoak eta industrialdeak mantentzea, bai eta jarduera espezifikoak ere, hala nola inausketa-lanak eta zuhaitzen mantentze-lanak.

Txerra Molinuevo alkateak positiboki baloratu du Indesak zerbitzu hauek martxan jarri izana eta azpimarratu du “akordio honek udal zerbitzuen kalitatea hobetzen jarraitzeko aukera ematen digu eta, aldi berean, enplegu inklusiboa eta kalitatezkoa sortzen laguntzen dugu. Amurriorentzat, garrantzitsua da zerbitzu eraginkorra emateaz gain, balio sozial erantsia ematen duten eta desgaitasunen bat duten pertsonen laneratzea errazten duten erakundeekin elkarlanean aritzea”.

• Eskaripeko zerbitzu berriak ostiraletan funtzionatuko du, doan, eta udalerriko kontzejuetan bizi diren pertsonen joan-etorriak erraztuko ditu

Amurrioko Udalak proiektu pilotu bat jarriko du abian, Amurrioko kontzejuetan bizi diren pertsonak udalerriaren erdigunera garraiatzeko udal barruko zerbitzu berri bat egiteko, ostiraletan, asteko azoka dela eta.

Zerbitzu hori ekainaren 1ean hasiko da, eta, hasiera batean, 5 hilabete iraungo du. Oraingo honetan, doako taxi-zerbitzua da, eta Arabako Foru Aldundiak eskaintzen duen zerbitzua indartzeko balio du Probaldian, erabiltzaile kopurua etengabe aztertuko egingo da, jakiteko ea zerbitzuarekin jarraitzen den edo zer hobekuntza eta aldaketa egin beharko liratekeen.

Bi línea dira: A linea (Baranbio-Berganza-Lezama-Larrinbe-Amurrio), eta B línea (Tertanga-DeIika-Artomaña-AIoria-Lekamaña-Saratxo- Amurrio). Bi kasuetan, geltoki zehatz batzuk ezarrita daude. Hona hemen ordutegiak: A linea: joanekoa 09:30etik 10:00etara eta itzulerakoa 13:00etatik 13:30era. B linea: Joanekoa 09:00etatik 09:30era eta itzulerakoa 12:30etik 13:00etara.

Zerbitzu hau erabili ahal izateko, HAZ-SAC Herritarren Arretarako Zerbitzuaren telefonora deitu beharko da (945 89 11 61) astelehenetik ostiralera, 08:00etatik 14:00etara, eta pertsonaren datuak, telefono-zenbakia eta erabili beharreko linea eman beharko dira. Zerrendak zerbitzua eman aurreko osteguneko 13:00etan itxiko dira.

Ekimen honen bidez, Amurrioko Udalak udalerriko kontzejuetan bizi diren pertsonen mugikortasuna eta irisgarritasuna hobetu nahi ditu, udalerriko gizarte eta merkataritza bizitzan parte har dezaten bultzatuz. Gainera, proiektu pilotu horri esker, garraioaren arloan dauden benetako beharrak ebaluatu ahal izango dira, eta udalerriko gune guztien arteko lurralde-kohesioa eta aukera-berdintasuna sendotzen lagunduko duten konponbideetarantz aurrera egin ahal izango da.

• Inbertsio-ahaleginari esker, 6,3 milioi euro baino gehiago mobilizatu dira etxebizitza-proiektu estrategikoetara eta hezkuntza- eta kirol-instalazioak leheneratu eta modernizatzera.
• Gizarte babeseko eta sustapeneko politikak berriro indartu dira, 2,9 milioi eurotik gora, eta partida aitzindariak jarri dira, hala nola zeliakoak dituzten familientzako laguntzak.

Amurrioko Udaleko Gobernu Taldeak, EAJ-PNV eta PSE-EEren koalizioek osatutakoak, 2026ko Aurrekontu Orokorren proposamena eraman du ohiko osoko bilkurara, 24.029.805,94 eurokoa. Kontu publiko zorrotz eta ordenatuek udalerriko gizarte-ezkutua blindatzen dute, zerbitzu publikoak mantentzea sustatzen dute eta inbertsio asmo sendoa mantentzen dute.

Dokumentuaren defentsan, udal kontuei alderdikeriatik urrunduz heltzeko beharra azpimarratu dute: "Eztabaida hau zorroztasunez, perspektibaz eta zintzotasun politikoarekin jorratu behar dela uste dugu. Izan ere, aurrekontu bat ez da soilik dokumentu tekniko bat edo kontabilitate aurreikuspen bat; lehentasunak definitzen ditu, udalerri eredu bat islatzen du eta administrazio batek herritarren benetako beharrei erantzuteko zer ahalmen duen zehazten du", adierazi du Txerra Molinuevo alkateak.

Inbertsio-estrategia jarraitua eta planifikatua

2026ko aurrekontuak 6,3 milioi euro baino gehiago mobilizatzen ditu zuzenean inbertsiora eta eraldaketara bideratuak (3,9 milioi inbertsio errealetan eta 2,4 milioi kapital transferentzietan batuz).

Partida horren barruan, zutabe nagusia Goikolarra auzoko etxebizitza eta hiri-birgaitzea izango da, eta 4 milioi euro baino gehiago mobilizatuko dira, zuzeneko jarduketen (1,8 milioi) eta egoiliarren etxebizitzak birgaitzeko laguntzen (2,4 milioi) artean banatuta. Horri gehitu behar zaizkio lehentasunezko ekipamendu publikoetako esku-hartze estrategikoak, hala nola:

• Hezkuntza arloa: Mendiko Ikastola Publikoak 550.000 euro baino gehiagoko injekzioa jasoko du (301.000 euro barne, Arabako Foru Aldundiak kofinantzatutako patioaren estalki berrirako), eta Zabalekoko instalazioek 332.000 euroko hobekuntza plana izango dute aldagela eta harmaila berriak eraikitzeko. Era berean, 100.000 euro gorde dituzte udal haurreskoletako ikasgeletan hainbat lanetan inbertitzeko.
• Kirol-arloa: 380.000 euroko inbertsio globala egingo da aurten padel-pisten egokitzapen akustikoa egiteko (105.000 euro) eta Udal Pilotalekua handitzeko lanak idatzi eta hasteko (275.000 euro). Proiektu horrek 2027rako 1.875.000 euroko konpromiso-kredituak ziurtatuta utziko ditu, Foru Planak (PFOS) babestuta.
• Urbanizazioa eta Tokiko Sustapena: 180.000 euro bideratuko dira Mendiko kalerako eta 187.500 euro Sukaldeberri proiektu berritzailerako, Refor-en, nekazaritzako elikagaien sektorea eta bertako produktua bultzatzeko.

Errefortzu soziala eta pertsonen babesa

Aurrekontuak berretsi egiten du udalerriaren laguntza-bokazioa, 2,9 milioi euro baino gehiago bideratzen baititu gizarte babeserako eta sustapenerako politiketara. Ildo horretan, nabarmentzekoak dira Eguneko Arretarako Baliabide Zentro (EGGZ) berria hornitzeko 200.000 euroko zuzkidura, San Mames Etxearen funtzionamendua (371.000 euro), gizarte-larrialdietarako 230.000 euroko laguntzak eta 10.000 euroko partida aitzindari bat sortzea, zeliakoak edo glutenarekiko intolerantzia larriak dituzten pertsonak dituzten familien elikadura-gainkostua arintzeko zuzeneko laguntzetan.

Bestalde, Udalak konpromiso sendoa hartzen du laneratzearekin eta tokiko ekoizpen-sarearekin, eta 900.000 euro baino gehiago bideratzen ditu enplegu eta prestakuntzara. Ekitaldi honetatik aurrera, kudeaketa hori zuzenean hartuko du bere gain udal-administrazioak. V. Berdintasun Plana (167.000 euro) bultzatzea eta 2,3 milioi euro baino gehiagoko kultur garapen indartsua bermatzen du, Kultur Etxea, Arte Eskola, Amurrio Antzokia eta euskarari 297.000 euroko laguntza emanez.

Landa-konpromisoa eta lurralde-nortasuna

Landa-guneen kohesioa funtsezko ardatz gisa finkatu da, eta 286.000 euroko ekarpen ekonomikoa egin die Administrazio Batzarrei (233.000 euroko ekarpen orokorra eta 34.000 euro baino gehiago eguneroko garraio-zerbitzuetarako eta laguntza teknikorako). Mugikortasunaren berrikuntza nagusi gisa, Udalak taxi zerbitzu pilotu berri bat aktibatuko du, erabat doakoa, kontzejuak hirigunearekin lotzeko asteroko azoka egunetan.

Hauteskunde-diskurtsoen aurreko kaudimena

Era berean, gogorarazi da apirilaren 30ean Udalak betetzen dituela Ekonomia eta Finantza Planean zehaztutako aurrekontu-egonkortasunaren eta gastu-arauaren helburuak. Aurrezki garbi positiboarekin eta gastu orokorretarako 5,5 milioi eurotik gorako diruzaintzako gerakinarekin, datuek erakusten dute udal kontuek osasun finantzario bikaina dutela. Udaletik gogorarazi nahi dute tokiko gobernuaren rola benetako ongizatea kudeatzea dela. David Romero Ogasun zinegotziak azpimarratu du: "Gobernatzeak horixe eskatzen du, hain zuzen ere: erabaki arduratsuak hartzea, desbideratzeak zuzentzea, aurreikuspenak doitzea eta zerbitzu publikoen eta inbertsio estrategikoen iraunkortasuna bermatzea. Aurrekontu honek estaldura soziala zabaltzen du, inbertsioa mantentzen du eta gure adierazle finantzarioak hobetzen ditu".

• Epaimahaiak 2026ko Amurrioko Jaietako irudi ofizial gisa Puesto estudioko lana hautatu du, 22 proposamenek parte hartu duten deialdi baten ondoren

Amurrioko Jaiak 2026 iragartzeko kartela dago jada. Proposamen irabazlea Puesto estudioak aurkeztu du, Alejandra Álvarez Morphy eta Fernando Arpio diseinatzaileek 2020an sortutako talde independenteak, Mexiko Hirian, Iruñean eta New Yorken egoitzak dituenak.

Amurrioko Udalak egindako deialdiaren bidez hautatu da kartela, eta 22 proposamenek hartu dute parte. Epaimahaiak bereziki nabarmendu du obrak tokiko nortasuna, tradizioa eta hizkuntza garaikidea uztartzeko duen gaitasuna, jai-giroko komunikazio-pieza gisa ezaguna eta eraginkorra den irudi batean.

Proposamenak Iguarrako kokatzen du konposizio baten elementu nagusi bezala, non Amurrioko sinbolo eta espazio esanguratsu ezberdinak agertzen diren, jai giroaren berezko erreferentziekin batera, hala nola konfetia edo su artifizialak. Emaitzak udalerriaren egungo irudia erakusten du, jaiei eta aniztasun sozial eta kulturalari lotuta.

Erabilitako teknika eta proposamenaren argitasun kontzeptuala ere baloratu ditu epaimahaiak, baita Amurrioko paisaia, arkitektura eta jai espiritua bezalako elementuak irudi bakar batean sintetizatzeko gaitasuna ere.

Puesto estudioak identitate bisuala, diseinu editoriala eta espaziora aplikatutako sistema grafikoak lantzen ditu, besteak beste, eta ibilbide ezaguna du nazioartean. Aurtengo edizioan, gainera, batzordeak lehiaketara aurkeztutako proposamenen kalitate eta aniztasun handia nabarmendu nahi izan du.

Haurren kategorian, jaietako kontrazalari dagokiona, 13 urteko Itsasne Basaldua Olartekoetxearen “Guk Jaietan” lanak irabazi du saria. Konposizio dinamiko eta koloretsua, eta jaien izpiritu parte-hartzailea modu alai eta zuzenean transmititzeko gaitasuna baloratu ditu epaimahaiak.

Halaber, aipamen berezia jaso dute Igone Olabarria Albizuaren “Iguarrako Maitekorra” (10 urte); Haizea Larrazabal Uriarteren “Jaiak” (7 urte); eta Daniela Alonso Valdésen “Iguarrako Zoriontsua” (9 urte) lanek.

Sari banaketa 2026ko ekainaren 11n izango da, 18:00etan, La Casona udal erakusketa aretoan. Egun horretan bertan, hautatutako lanen erakusketa bat inauguratuko da, eta ekainaren 20ra arte egongo da ikusgai.